BAKI, AzerVoice, Nərmin Ağayeva
İsrail ordusu Qəzza zolağında ağır şəraitdə saxlanılan 10 fələstinlini azad edib.
AzerVoice xəbər verir ki, Əl-Əqsa Şəhidləri Xəstəxanasının mənbələrinə görə, sərbəst buraxılan şəxslər Xan Yunisin şərqindəki Kisufim keçidindən Qəzzaya daxil olub. Onların əksəriyyətinin yorğun vəziyyətdə olduğu, bəzilərində isə işgəncə izləri müşahidə edildiyi bildirilib.
Məlumata əsasən, İsrail vaxtaşırı kiçik qruplar halında fələstinliləri azad etsə də, həmin şəxslərdə aclıq və ağır fiziki işgəncə əlamətləri aşkar olunur. Fələstin Əsirlər Dərnəyi daha əvvəl açıqlamışdı ki, quru hücumu başlayandan bəri İsrail minlərlə fələstinlini, o cümlədən qadınlar, uşaqlar, tibb personalı və mülki müdafiə işçilərini saxlayıb.
Qeyd edək ki, İsrailin hücumları nəticəsində Qəzzada aclıqdan ölənlərin sayı 271-ə çatıb, onların 112-si isə uşaqdır. Beynəlxalq təşkilatların xəbərdarlıqlarına baxmayaraq, bölgədə humanitar böhran dərinləşməkdə davam edir.
