BAKI, AzerVoice, Nərmin Ağayeva
Qətər Xarici İşlər Nazirliyinin sözçüsü Məcid əl-Ənsari, Qəzza zolağında atəşkəs və məhbus mübadiləsi danışıqlarında HƏMAS-ın qəbul etdiyi təklifin İsrailin əvvəllər təsdiqlədiyi çərçivəyə uyğun olduğunu, lakin İsrailin razılığa gəlmək istəmədiyini vurğulayıb.
AzerVoice xəbər verir ki, Dohada keçirilən mətbuat konfransında Ənsari, Qətər, ABŞ və Misirin vasitəçiliyi ilə aparılan danışıqlara toxunaraq, “HƏMAS-ın qəbul etdiyi təklif İsrailin əvvəlki təsdiqləri ilə uyğundur. Cavab vermək növbəsi İsraildədir, lakin belə görünür ki, İsrail razılığa gəlmək istəmir,” - deyə bildirib. O, Qətərin müharibəni dayandırmaq üçün bütün səyləri dəstəklədiyini və danışıqların Qahirədə və ya Dohada keçirilməsinin əhəmiyyətsiz olduğunu, əsas məqsədin tez bir zamanda atəşkəsə nail olmaq olduğunu qeyd edib.
Ənsari, İsrailin rəsmi cavab verməkdən yayınmasını tənqid edərək, “İsrail nə təklifi qəbul edib, nə rədd edib, nə də alternativ təklif təqdim edib. İsrail ən qısa zamanda rəsmi cavab verməlidir,” - deyə bildirib. O, İsrailin Qəzzada hərbi əməliyyatlarını genişləndirməsinin müsbət nəticə verməyəcəyini vurğulayıb və beynəlxalq ictimaiyyəti İsrailə təzyiq göstərməyə çağırıb.
İsrail mətbuatına danışan adsız bir rəsmi, Tel-Əvivin bütün məhbusların azad edilməsini tələb edən mövqeyində israrlı olduğunu bildirib. İsrail Baş Nazirinin ofisi isə “The Times of Israel” qəzetinə açıqlamasında, hazırki mərhələdə Doha və ya Qahirəyə nümayəndə heyəti göndərmək planının olmadığını qeyd edib.
Xatırladaq ki, İsrail Təhlükəsizlik Kabineti 8 avqust 2025-ci ildə Qəzza şəhərinin şimalının işğal planını təsdiqləyib. Baş Nazir Benyamin Netanyahu, Nazirlər Kabineti iclasından əvvəl verdiyi açıqlamada, bütün Qəzza zolağının işğalını hədəflədiklərini bildirib. Plana əsasən, birinci mərhələdə təxminən bir milyon fələstinli cənuba qovulacaq, şəhər mühasirəyə alınacaq və intensiv hücumlardan sonra işğal ediləcək. İkinci mərhələdə isə Qəzzanın mərkəzindəki xarabalığa çevrilmiş qaçqın düşərgələrinin işğalı nəzərdə tutulur.
Qəzza zolağı 1967-ci ildən 2005-ci ilə qədər İsrail tərəfindən 38 il işğal edilib. Hazırda 2,3 milyon fələstinlinin yaşadığı bu ərazi, 2007-ci ildən bəri ağır blokada altındadır. 2023-cü ilin oktyabrından başlayan müharibədə, Qəzza Səhiyyə Nazirliyinə görə, 62,000-dən çox fələstinli həlak olub, 135,957 nəfər yaralanıb və əhalinin 90%-i dəfələrlə məcburi köçürülüb.
HƏMAS, Misir və Qətərin təqdim etdiyi atəşkəs və əsir mübadiləsi təklifini qəbul etdiyini elan edib. Təklif, 60 günlük müvəqqəti atəşkəs, 50 İsrail girovunun yarısının azad edilməsi və Fələstin məhbuslarının mübadiləsini nəzərdə tutur. Lakin İsrail bu təklifə rəsmi cavab verməyib və bütün girovların birdəfəlik azad edilməsində israr edir.
Qeyd edək ki, Qətər və Misir, beynəlxalq ictimaiyyətin dəstəyi ilə danışıqları irəli aparmağa çalışsa da, İsrailin hərbi strategiyası və danışıqlardakı sərt mövqeyi atəşkəsə nail olmağı çətinləşdirir. Türkiyə də daxil olmaqla bir sıra ölkələr, Qəzzadakı humanitar böhranın aradan qaldırılması üçün təzyiqləri artırmağa çağırır.
