BAKI, AzerVoice, Zeynəb Raminqızı
İsrail ordusunun Qəzzaya hücumu nəticəsində 4 fələstinli həlak olub.
AzerVoice xəbər verir ki, Fələstinin rəsmi xəbər agentliyi WAFA-nın məlumatına görə, İsrail döyüş təyyarələri Qəzza zolağının mərkəzindəki Bureyc düşərgəsini və Qəzza şəhərinin qərbini hədəf alıb.
Bureyc düşərgəsində Qənim ailəsinə məxsus evin vurulması nəticəsində bir qadın və uşağı həlak olub. Qəzza şəhərinin qərbindəki Rimal məhəlləsindəki Şuheda küçəsində Fələstin Qülləsi yaxınlığındakı iqamətgahın hədəfə alınması nəticəsində bir qadın da həlak olub.
Qəzzanın cənubundakı 8-ci küçə marşrutu İsrail artilleriyasının atəşinə məruz qalıb və Şati Qaçqınlar Düşərgəsində məcburi köçkün fələstinlilərin yerləşdiyi çadırlara hava hücumu nəticəsində çoxlu sayda insan yaralanıb. Xan Yunisdə də hava hücumu nəticəsində bir fələstinli həlak olub.
Qeyd edək ki, İsrailin 7 oktyabr 2023-cü ildən bu yana Qəzza zolağına həyata keçirdiyi hücumlarda həlak olanların sayı son 24 saatda 76 nəfər artaraq 62 min 895 nəfərə çatıb.
