BAKI, AzerVoice, Nailə Babazadə
İsrail ordusunun bu səhərdən etibarən Qəzza zolağının şimalındakı Qəzza şəhərinin müxtəlif bölgələrinə həyata keçirdiyi hücumlarda 16 fələstinli həyatını itirib.
AzerVoice xəbər verir ki, Fələstinin rəsmi xəbər agentliyi WAFA-nın məlumatına görə, İsrail ordusu Qəzza şəhərinin müxtəlif yerlərindəki evlərə və köçkünlərin yerləşdiyi çadırlara hücum edib.
Qəzza şəhərinin mərkəz hissəsində yerləşən Dərəc məhəlləsində bir evin İsrail qırıcıları tərəfindən hədəf alınması nəticəsində 3 nəfər həyatını itirib, 7 nəfər yaralanıb.
Şəhərin cənub-qərbindəki Rimal məhəlləsində yerləşən İslam Universitetinin ərazisindəki köçkünlərin yaşadığı çadır İsrail ordusunun hədəfi olub. Hücum nəticəsində 3 nəfər həyatını itirib.
Yenə Rimal məhəlləsindəki çadır və evlərə İsrailə məxsus pilotsuz uçuş aparatı (PUA) tərəfindən həyata keçirilən hücumlarda da 3 nəfər ölüb.
Tel əl-Heva məhəlləsində bir mənzilə edilən bomba hücumu nəticəsində 3 fələstinli həyatını itirib.
İsrail qırıcıları Səlasini küçəsində yerləşən bir mənzili bombalayıb. Hücumda 2 fələstinli ölüb.
Şəhərin qərbində yerləşən Əzhər Universiteti yolayrıcında köçkünlərin sığındığı bir çadır da İsrail ordusunun hədəfi olub. Bu hücum nəticəsində 2 nəfər həyatını itirib, çox sayda insan yaralanıb.
