BAKI, AzerVoice, Nailə Babazadə
İsrail ordusunun Baş Qərargah rəisi, general Eyal Zamir, “Knesset”də çıxışı zamanı Baş nazir Benyamin Netanyahudan Qəzzadakı əməliyyatların növbəti mərhələsi ilə bağlı heç bir aydın göstəriş almadığını bildirib.
AzerVoice xəbər verir ki,onun sözləri, ordunun Qəzzaya hücumlarını genişləndirməyə hazırlaşdığı bir vaxtda, İsrail ordusunun hazırlıq vəziyyətinə dair narahatlıqları artırıb.
“Yediot Aharonot” qəzetinin məlumatına görə, Zamir “Knesset”in Xarici İşlər və Müdafiə Komitəsinin ən gizli struktur vahidlərindən biri olan kəşfiyyat üzrə alt komitəsinə qapalı iclasda məlumat verib. O, millət vəkillərinə “Baş nazir bizə növbəti addımlar barədə heç nə demir. Nəyə hazırlaşmalı olduğumuzu bilmirik. Əgər hərbi hökumət istəyirlərsə, açıq şəkildə deməlidirlər.” - deyə qeyd edib.
Zamir həmçinin ABŞ tərəfindən maliyyələşdirilən və Qəzzada fəaliyyət göstərən Humanitar Yardım Fondunun ərzaq və yardım paylanmasını da kəskin tənqid edib. O, proqramı “uğursuz” adlandıraraq, dörd mərkəzlə işləməyin effektiv olmadığını, buna baxmayaraq mərkəzlərin sayının 12-yə çatdırılmasının izahsız olduğunu qeyd edib.
General, əhalinin təxliyəsindən sonra belə, beynəlxalq hüquqa uyğun olaraq Qəzzaya humanitar yardımların daxil olmağa davam edəcəyini vurğulayıb. Bununla yanaşı, o, xəbərdarlıq edib ki, fərqli siyasi qərar qəbul edilməzsə, əməliyyatların nəticəsi İsrail qüvvələrinin Qəzzanın mərkəzi qaçqın düşərgələrinə girməsi olacaq. Bu isə geniş ərazilərin hərbi idarəetmə altına keçməsi deməkdir – Zamirin sözlərinə görə, ordunun arzulamadığı bir ssenaridir.
