BAKI, AzerVoice, Nailə Babazadə

İsrail ordusu İvrit təqviminə görə yeni ilin başlanğıcı sayılan Roş Aşana bayramı münasibətilə 22–23 sentyabr tarixlərində ölkənin bütün bölgələrində yerləşən hərbi birləşmələrin gücləndirildiyini açıqlayıb.

AzerVoice xəbər verir ki, ordunun yaydığı rəsmi bəyanatda qeyd olunub ki, vəziyyətin qiymətləndirilməsindən sonra müxtəlif bölgələrdə həm müdafiə, həm də hücum məqsədilə birliklər yüksək hazırlıq vəziyyətinə gətirilib və əlavə qüvvələrlə gücləndirilib.

Bu qərar, Qəzza zolağında 65 mindən çox fələstinlinin ölümünə səbəb olan və beynəlxalq aləmdə ciddi tənqidlərə yol açan İsrail hücumlarının yaratdığı siyasi təzyiqlərin artdığı bir dövrə təsadüf edir. Məhz bu təzyiqlərin nəticəsində bir sıra ölkələr, o cümlədən Böyük Britaniya, Kanada, Avstraliya və Portuqaliya Fələstin dövlətini rəsmi şəkildə tanıdıqlarını bəyan ediblər.

İsrailin dövlət televiziyası KAN, ordunun bu addımını gerginliyin artması ehtimalı ilə, xüsusilə də işğal altındakı İordan çayının qərb sahilində (Qərbi Şəriə) yerləşən birliklərin gücləndirilməsi kimi şərh edib.

Tel-Əviv rəhbərliyi qərara sərt reaksiya verib. Sağçı nazirlər işğal altındakı Qərbi Şəriənin ilhaqını tələb ediblər. Baş nazir Benyamin Netanyahu isə İsrailin bu bölgədəki qanunsuz yəhudi yaşayış məntəqələrinin sayını ikiqat artırdığını və Fələstin dövlətinin tanınması ilə bağlı qərarlara ABŞ səfərindən qayıtdıqdan sonra cavab veriləcəyini bildirib.