BAKI,AzerVoice
İraq Müstəqil Ali Seçki Komissiyası noyabrın 11-də keçiriləcək parlament seçkilərinə hazırlıqların son mərhələsinə çatdığını bildirib. Qurum seçki mexanizmlərini yekunlaşdırmaqla yanaşı, bir sıra keçmiş və hazırkı deputatların namizədliyini ləğv edib, bu isə ölkədə geniş siyasi mübahisələrə səbəb olub.
AzerVoice xəbər verir ki, ən çox diqqət çəkən qərarlardan biri “Əzm” İttifaqının Kərkükdən olan namizədi Səddam Hüseynin seçkilərdən kənarlaşdırılması olub. Komissiyanın bu qərarı sosial və siyasi çevrələrdə ciddi rezonans doğurub.
Seçki Komissiyası həmçinin “istisna və ya kənarlaşdırma mexanizminin” seçki gününədək qüvvədə qalacağını açıqlayıb. Bu isə bəzi siyasi dairələrdə narahatlıq yaradıb - müşahidəçilər hesab edirlər ki, bu mexanizm nüfuzlu qüvvələrin istəmədiyi namizədləri seçkilərdən uzaqlaşdırmaq üçün istifadə oluna bilər.
Qurum eyni zamanda bir çox siyasi partiyalara və ittifaqlara cərimələr tətbiq edib. Cərimələr seçki kampaniyası qaydalarının pozulması ilə əlaqələndirilir. Cərimələnənlər arasında Baş nazir Məhəmməd Şiə əs-Sudaninin rəhbərlik etdiyi “İmar və İnkişaf İttifaqı”, eləcə də sabiq Baş nazir Nuri əl-Malikinin rəhbərlik etdiyi “Qanun Dövləti İttifaqı” da var.
Seçki Komissiyası bəyan edib ki, seçkilərin keçirilməsi üçün bütün logistika və texniki hazırlıqlar başa çatdırılıb və prosesi şəffaf şəkildə həyata keçirmək məqsədilə lazımi infrastruktur təmin olunub.
