BAKI, AzerVoice, Nailə Babazadə
Qəzza Səhiyyə Nazirliyi İsrail ordusunun atəşkəsin qüvvəyə minməsindən sonra da davam edən hücumları nəticəsində 23 fələstinlinin həlak olduğunu, 122 nəfərin isə yaralandığını açıqlayıb.
AzerVoice xəbər verir ki, nazirliyin məlumatına görə, İsrail ordusunun atəşkəsə baxmayaraq həyata keçirdiyi hücumlarda 381 nəfər dağıntılar altından çıxarılıb. Qəzza zolağında hələ də minlərlə insanın dağıntılar altında qaldığı bildirilir.
Açıqlamada qeyd olunub ki, İsrailin 2023-cü ilin oktyabrında başladığı hücumlar nəticəsində ölənlərin ümumi sayı 67 min 967 nəfərə, yaralıların sayı isə 170 min 179 nəfərə çatıb.
Xatırladaq ki, ABŞ Prezidenti Donald Tramp 9 oktyabrda Misirdə aparılan danışıqlarda İsrail və HƏMAS arasında atəşkəs planının ilk mərhələsinin razılaşdırıldığını açıqlamışdı. Razılaşma İsrail hökumətinin təsdiqi ilə 10 oktyabrda qüvvəyə minib və həmin gün saat 12:00-dan etibarən Qəzza zolağında atəşkəs elan olunub.
Lakin bölgədən gələn son məlumatlara əsasən, İsrail ordusu atəşkəsə baxmayaraq hücumlarını tam dayandırmayıb və Qəzzada mülki itkilər davam edir.
