BAKI,AzerVoice
BMT Təhlükəsizlik Şurası Suriya Prezidenti Əhməd əş-Şəraaya qarşı tətbiq olunan sanksiyaları ləğv edib. Məlumata görə, o, bazar ertəsi günü Ağ Evdə ABŞ Prezidenti Donald Tramp ilə görüşəcək.
Cümə axşamı ABŞ tərəfindən hazırlanmış qətnamə həmçinin Suriya daxili işlər naziri Ənəs Xətaba qarşı sanksiyaların ləğvini nəzərdə tutur.
Qətnamə 14 dövlət tərəfindən dəstəklənib, Çin isə səsvermədən çəkinib.
Təhlükəsizlik Şurası qətnaməsində “Suriyanın suverenliyinə, müstəqilliyinə, ərazi bütövlüyünə və milli birliyinə tam hörmətlə yanaşmaq” öhdəliyini bir daha təsdiqləyib, həmçinin Suriyanın humanitar yardımın təhlükəsiz və maneəsiz şəkildə çatdırılmasına, terrorizmlə mübarizəyə dair öhdəliklərini alqışlayıb.
Sənəddə Suriyadan “xarici terrorçu döyüşçülərin” yaratdığı təhlükəyə qarşı mübarizə aparması, bütün suriyalıların insan hüquqlarını qoruması, narkotiklərlə mübarizə, ədalət və barışıq prosesini irəli aparması, kimyəvi silahların qalıqlarını tamamilə aradan qaldırması və suriyalıların rəhbərlik etdiyi hərtərəfli siyasi proses qurması tələb olunur.
ABŞ-ın BMT-dəki səfiri Mayk Volts qərarı alqışlayaraq bildirib: “Bu sənədin qəbul edilməsi ilə Şura güclü siyasi mesaj göndərdi - Suriya yeni bir mərhələyə qədəm qoyub.”
Çinin səfiri Fu Kunq isə səsvermədən çəkinib və Suriyada “xarici terrorçu döyüşçülərin” hələ də təhlükə mənbəyi olaraq “həssas təhlükəsizlik vəziyyətindən istifadə edə biləcəyindən” narahatlığını bildirib. O, həmçinin Təhlükəsizlik Şurasının vəziyyəti “tam şəkildə qiymətləndirmədiyinə” görə təəssüfünü ifadə edib.
Suriya Xarici İşlər Nazirliyi səsvermədən sonra ABŞ-a və dost ölkələrə “dəstəklərinə görə təşəkkürünü” bildirib.
XİN rəhbəri Əsəd əş-Şeybani “X” platformasında paylaşım edib.
“Suriya ABŞ-a və dost dövlətlərə ölkəmizə və xalqımıza verdikləri dəstəyə görə minnətdarlığını bildirir.” O əlavə edib ki, Suriya diplomatiyası “aktiv iştirakı və sabit addımlarla irəliləmək bacarığı ilə maneələri aradan qaldıraraq daha açıq və sabit gələcəyə doğru yol açır.”-deyə o payılaşımda yazıb.
Əhməd əş-Şəraaya qarşı sanksiyaların rəsmi şəkildə qaldırılması daha çox simvolik xarakter daşıyır - çünki o, prezident kimi xaricə səfərləri zamanı oxşar müvəqqəti azadlıqlardan faydalanırdı. Qərar həmçinin onun aktivlərinin dondurulmasının və silah embarqosunun ləğvini nəzərdə tutur.
Məlumata görə, Prezident Donald Tramp 10 noyabrda Suriya liderini Vaşinqtonda danışıqlar üçün qəbul edəcək. Əş-Şəraa bildirib ki, ölkəsində sülhün bərpası istiqamətində “əla nəticələr” əldə olunub.
Bu, onun ABŞ-a ilk rəsmi səfəri olacaq, baxmayaraq ki, o, ötən ilin sentyabrında BMT Baş Assambleyasının Nyu-York sessiyasında çıxış etməklə Suriyadan onilliklər sonra bu tribunada söz alan ilk prezident olmuşdu.
May ayında isə Əhməd əş-Şəraa, keçmiş prezident Bəşşar Əsədi devirdikdən sonra, Tramp ilə ilk dəfə Ər-Riyadda ABŞ prezidentinin regional səfəri çərçivəsində görüşmüşdü.
Vaşinqton iyul ayında Əhməd əş-Şəraanın rəhbərlik etdiyi silahlı qruplaşmanı - “Heyət Təhrir əş-Şam”ı terror təşkilatları siyahısından çıxarmışdı.
Dəməşq bazar günü bildirib ki, prezident Vaşinqtonda keçiriləcək görüşlərdə qalan sanksiyaların qaldırılması, yenidənqurma və terrorizmlə mübarizə məsələlərini müzakirə edəcək.
