BAKI, AzerVoice, Nailə Babazadə
İsrail ordusunun Qəzza zolağına həyata keçirdiyi hücumlar nəticəsində həlak olanların sayının 71 min 409 nəfərə yüksəldiyi bildirilib.
AzerVoice xəbər verir ki, Qəzzadakı Səhiyyə Nazirliyi tərəfindən yayımlanan yazılı açıqlamada İsrailin hücumları nəticəsində qeydə alınan itkilər və dağıntılar altından çıxarılan yeni cəsədlərlə bağlı son məlumatlar paylaşılıb.
Məlumata görə, İsrail hücumları nəticəsində həyatını itirən 14 fələstinlinin nəşi xəstəxanalara çatdırılıb, hücumlar zamanı 17 nəfər yaralanıb.
Bildirilib ki, atəşkəsin qüvvəyə mindiyi vaxtdan etibarən İsrailin həyata keçirdiyi hücumlar nəticəsində 439 nəfər ölüb, 1 223 nəfər yaralanıb, dağıntılar altından isə 688 nəfərin cəsədi çıxarılıb.
Qeyd olunub ki, İsrailin 2023-cü ilin oktyabrında Qəzza zolağına başladığı hücumlar nəticəsində ölənlərin sayı 71 min 409 nəfərə, yaralananların sayı isə 171 min 304 nəfərə çatıb.
ABŞ Prezidenti Donald Tramp oktyabrın 9-da Misirdə davam edən danışıqlar çərçivəsində İsrail və HƏMAS hərəkatının Qəzzada atəşkəs planının birinci mərhələsini təsdiqlədiyini açıqlamışdı.
Danışıqların aparıldığı Misirdə imzalanan razılaşma İsrail hökumətinin təsdiqindən sonra 10 oktyabrda qüvvəyə minib.
Buna baxmayaraq, İsrail ordusu Qəzza zolağında əldə olunmuş atəşkəsə rəğmən, demək olar ki, hər gün müxtəlif bəhanələrlə fələstinlilərə qarşı hücumlar həyata keçirməyə davam edir.
