BAKI, VOA, Nailə Babazadə
Səudiyyə Ərəbistanı Müdafiə Nazirliyi çərşənbə günü verdiyi rəsmi bəyanatda ölkənin hava hücumundan müdafiə qüvvələrinin iki pilotsuz uçuş aparatını (PUA) aşkar edərək məhv etdiyini açıqlayıb.
VOA xəbər verir ki, nazirliyin sözçüsü, general-mayor Turki əl-Maliki bildirib ki, pilotsuz aparatlar son bir neçə saat ərzində zərərsizləşdirilib və bölgədəki strateji obyektlərin təhlükəsizliyi tam təmin edilib. Bu müdaxilə Səudiyyə Ərəbistanının son həftələrdə, xüsusilə neftlə zəngin Şərq vilayətini hədəf alan onlarla PUA-nı vurduğu bir vaxtda baş verib.
Fevralın 28-də başlayan İran müharibəsi artıq ikinci ayına daxil olub. Münaqişənin miqyası genişləndikcə İranın raket və dron hücumları getdikcə daha çox Körfəz ölkələrini və kritik enerji infrastrukturunu hədəf almağa başlayıb. Səudiyyə Ərəbistanı rəsmiləri bildirirlər ki, ölkənin hava hücumundan müdafiə şəbəkəsi ən yüksək hazırlıq vəziyyətindədir və mülki əhalini həmçinin iqtisadi mərkəzləri hədəf alan istənilən təhdidə qarşı operativ cavab verilməkdədir.
Xatırladaq ki, dünən əl-Xərc bölgəsində bir dronun zərərsizləşdirilməsi zamanı düşən qalıqlar nəticəsində iki nəfər yaralanmışdı. Regional gərginlik fonunda Səudiyyə Ərəbistanı həm hava hücumundan müdafiə sistemlərini gücləndirir, həm də beynəlxalq tərəfdaşlarla kəşfiyyat məlumatlarının mübadiləsini davam etdirir. Müdafiə Nazirliyi bəyan edib ki, ölkənin suverenliyini və sabitliyini qorumaq üçün hərbi əməliyyatlar qətiyyətlə davam etdiriləcək.
