BAKI,VOA, Nailə Babazadə

Küveyt Dövlət Neft Şirkəti (KPC) Əl-Əhmədi limanındakı strateji neft emalı zavodunun pilotsuz uçuş aparatları (PUA) tərəfindən hədəf alındığını açıqlayıb.

VOA xəbər verir ki,Küveytin rəsmi xəbər agentliyi KUNA-nın yaydığı məlumata görə, hücum sübh saatlarında baş verib və nəticədə zavodun bir neçə əməliyyat blokunda yanğınlar başlayıb. Şirkət rəsmiləri hadisədən dərhal sonra fövqəladə hallar və yanğınsöndürmə briqadalarının müdaxilə planlarını işə saldığını və yanğının digər sahələrə yayılmaması üçün intensiv iş apardıqlarını bildiriblər.

Rəsmi bəyanatda hücum zamanı insan tələfatı və ya yaralanma faktının olmadığı vurğulanıb. KPC işçilərin təhlükəsizliyini təmin etmək və strateji obyektlərin mühafizəsini gücləndirmək məqsədilə bütün zəruri qabaqlayıcı tədbirlərin alındığını diqqətə çatdırıb. Qeyd olunub ki, Əl-Əhmədi limanı ölkənin neft ixracı və emalı zəncirində həlledici rol oynayır və bu cür hücumlar enerji təchizatı sabitliyinə birbaşa təhdid hesab olunur.

Küveyt ordusu isə gecə ərzində ölkə səmasına daxil olan PUA və raket hücumlarına üç dəfə uğurlu cavab verdiyini elan edib. İran müharibəsinin regional miqyasda genişlənməsi fonunda Küveytin enerji infrastrukturu son həftələrdə mütəmadi olaraq hədəfə alınır. Beynəlxalq müşahidəçilər strateji limanlara və neft emalı zavodlarına edilən bu hücumların qlobal neft bazarlarında qiymət dalğalanmalarına səbəb ola biləcəyi barədə xəbərdarlıq edirlər.