BAKI,VOA, Nailə Babazadə

Livan Səhiyyə Nazirliyinin yaydığı son rəsmi məlumata görə, İsrail ordusunun 2 martdan bəri ölkəyə təşkil etdiyi hücumlarda həyatını itirənlərin sayı son 24 saatda 36 nəfər artaraq 1497-yə çatıb. Yaralıların ümumi sayının isə 4 min 639 nəfərə yüksəldiyi bildirilir.

VOA xəbər verir ki, hesabatda qeyd olunur ki, həyatını itirənlər arasında 130 uşaq və 101 qadın var. Xüsusilə narahatlıq doğuran məqam isə vəzifə başında həlak olan səhiyyə işçilərinin sayının 57-yə yüksəlməsidir. Bu, bölgədəki tibbi xidmətlərin göstərilməsində ciddi çətinliklər yaradır.

İsrailin həm havadan, həm də dənizdən həyata keçirdiyi intensiv bombardmanlar, eləcə də quru işğalını genişləndirmə qərarı Livan daxilində böyük bir köç dalğasına səbəb olub. Livan hökuməti hücumlar səbəbindən yurd-yuvasından didərgin düşən insanların sayının 1 milyon 162 mini keçdiyini açıqlayıb. Paytaxt Beyrut da daxil olmaqla, ölkənin bir çox strateji nöqtələri hələ də atəş altındadır.