İsrailin Livanın cənub və şərq bölgələrinə endirdiyi zərbələr nəticəsində azı 3 nəfər ölüb, 23 nəfər yaralanıb.

ArabAZ xəbər verir ki,Livan Səhiyyə Nazirliyinin məlumatına görə, zərbələr cənubdakı Sur və Nəbətiyyə, eləcə də şərqdəki Bəqa bölgəsində 5 əraziyə endirilib. Hadisə İsrail ilə İranın dəstəklədiyi “Hizbullah” arasında atəşkəsə baxmayaraq baş verib.

Livanın Milli Xəbər Agentliyi bildirib ki, Nəbətiyyədə iki gənc motosikletlə hərəkət edərkən hədəfə alınıb və hadisə yerində ölüblər. İsrail ordusu cümə axşamı strateji Əli əl-Tahir yüksəkliyinə nəzarəti ələ keçirdiyini açıqlayıb.

İsrail cümə günü Nəbətiyyə bölgəsində zərbələri gücləndirib və İsrail sərhədindən 10 kilometrdən çox məsafədə yerləşən Rmadiyə kəndini də hədəfə alıb. Burada 1 nəfər ölüb, 15 nəfər yaralanıb. Yaralananlar arasında 2 uşaq, 3 qadın və 6 xilasedici də var.

İsrail ordusu zərbələrin “Hizbullah”ın İsrail əsgərlərinə qarşı pilotsuz uçuş aparatı ilə hücumundan sonra həyata keçirildiyini bildirib.

İsrail və “Hizbullah” arasında döyüşlər mart ayında başlayıb. Livanın məlumatına görə, İsrailin hava hücumları və quru əməliyyatları nəticəsində 4 300-dən çox insan həlak olub.

İyun ayında ABŞ-İran arasında anlaşma memorandumu və İsrail-Livan arasında çərçivə sazişinin əldə olunmasından sonra vəziyyət nisbətən sakitləşsə də, Livan ərazisində İsrail zərbələri davam edir. BMT-nin Livandakı humanitar koordinatoru İmran Riza bildirib ki, atəşkəsdən sonra Nəbətiyyəyə qayıdan ailələr genişmiqyaslı dağıntılar, əsas xidmətlərin çatışmazlığı və davam edən təhlükəsizlik problemləri ilə üzləşirlər.