BAKI,VOA
Dəməşqdəki Dördüncü Cinayət Məhkəməsi bazar günü Suriyanın keçmiş rəhbərliyinə — Bəşşar Əsəd rejiminə qarşı keçirilən açıq məhkəmə prosesinin ikinci iclasına başlayıb. Məhkəmə devrilmiş rejimin ən yüksək rütbəli simalarını mülki hüquqlardan məhrum etmək və onların bütün daşınar və daşınmaz əmlaklarını hökumətin idarəçiliyinə vermək barədə qərar çıxarıb.
Məhkəmə qərarı ilə aşağıdakı şəxslər bütün mülki hüquqlarını itiriblər:
Bəşər Əsəd və Mahir Əsəd, Fəhd əl-Freyc, Məhəmməd Əyyuş, Luay əl-Əli, Qusay Mihub, Vafiq Nasir və Talal əl-Asimi.
Bu hökm aprel ayındakı ilk iclasın davamı olaraq qiyabi şəkildə verilib. Çünki sözügedən şəxslər məhkəməyə dəvət edilmələrinə baxmayaraq, irəli sürülən ittihamlara cavab vermək üçün ədalət qarşısına çıxmayıblar.
Atif Nəcibin mühakiməsi: Dırnaqların qopardılması və işgəncələr
Eyni zamanda, Dəməşq Ədliyyə Sarayında keçmiş rejimin tanınmış simalarından biri — Atif Nəcibin mühakiməsi davam edir. 2025-ci ilin yanvarında Laziqiyədə tutulan Nəcib, keçmiş rejimin ədalət qarşısına çıxarılan ilk yüksək rütbəli rəsmisidir.
Hakim Fəxrəddin əl-Uryan iclasın gedişatında Atif Nəcibə qarşı müddəti keçməyən (zaman aşımı olmayan) 10-dan çox ağır ittiham irəli sürüb. Bu ittihamlar:
Dəra şəhərində dinc etirazların yatırılması;
Məhbuslara, o cümlədən azyaşlılara qarşı dırnaqların qopardılması və elektrik şoku kimi ağır işgəncələrin verilməsi;
İşgəncə nəticəsində sistemli ölümlərə yol açan əməllər;
Öməri məscidindəki qətliamın və dinc etirazçıların güc tətbiqi ilə dağıdılmasının birbaşa əmrlərini verməkdir.
Beynəlxalq hüquq və şahidlər
Hakim qeyd edib ki, Nəcib və hazırda qaçan digər müttəhimlərin əməlləri mülki şəxslərə qarşı "genişmiqyaslı və sistemli hücum" xarakteri daşıyıb. Bu əməllər Cenevrə konvensiyalarına və beynəlxalq humanitar hüquqa əsasən müharibə cinayətləri kimi tövsif edilib.
Məhkəmədə Dəra şəhərindən olan 80-ə yaxın zərərçəkmiş iddialarını təqdim edib. Onların arasında təhlükəsizlik səbəbindən "gizli şahidlər" də yer alıb. İclasda qurbanların ailələri ilə yanaşı, "Milli Keçid Ədaləti Heyəti"nin üzvləri və beynəlxalq hüquq müdafiə təşkilatlarının nümayəndələri də iştirak ediblər.
Xatırladaq ki, Əsəd rejimi simalarının mühakimə olunduğu ilk tarixi iclas bu il aprelin 26-da keçirilib.
