BAKI,VOA,Yusif Şərifzadə
Livanın cənubunda İsrail-Livan sərhədi yaxınlığında gərginlik yenidən artıb. Hizbullah İsrailə məxsus hərbi texnikanı pilotsuz uçuş aparatı ilə hədəfə aldığını açıqlayıb.
VOA xəbər verir ki, Hizbullahın yaydığı məlumata əsasən, hücum Livanın cənubundakı Odaisseh qəsəbəsində, İsrail sərhədinə yaxın ərazidə həyata keçirilib. Bildirilir ki, pilotsuz uçuş aparatı vasitəsilə İsrailə məxsus hərbi texnika hədəf alınıb.
İsrail ordusu isə hadisə ilə bağlı açıqlamasında sərhəd bölgəsində “şübhəli hava hədəflərinin” aşkar edildiyini təsdiqləyib. Məlumatda bəzi obyektlərə zərbələrin dəydiyi qeyd edilsə də, hadisənin nəticələri və mümkün itkilərlə bağlı əlavə detallar açıqlanmayıb.
Son aylarda İsrail-Livan sərhədində təhlükəsizlik vəziyyətinin həssas olaraq qaldığı və tərəflər arasında qarşılıqlı hərbi fəaliyyətlərin regionda gərginliyi artırdığı müşahidə olunur.
