BAKI,VOA,Yusif Şərifzadə
Avropa İttifaqı İordan çayının Qərb sahilində fələstinlilərə qarşı insan hüquqları pozuntularında iştirak etdiyi bildirilən israilli məskunlaşmaçı qruplara və şəxslərə qarşı yeni sanksiyalar elan edib.
VOA xəbər verir ki, Avropa İttifaqı Şurasının yaydığı açıqlamada sanksiyaların dörd təşkilat və üç şəxsə şamil olunduğu bildirilib.
Aİ həmin şəxslər və qurumları “ekstremist israilli məskunlaşmaçılar” kimi xarakterizə edərək onların fəaliyyətinin fələstinlilərin zorla köçürülməsinə və bölgədə gərginliyin artmasına səbəb olduğunu qeyd edib.
Sanksiya siyahısına daxil edilən qurumlar arasında “Nachala” məskunlaşma hərəkatı və onun rəhbəri Daniella Vays, həmçinin Regavim qeyri-hökumət təşkilatı və onun direktoru Meir Doyç yer alır.
Aİ-nin açıqlamasında bildirilir ki, həmin şəxslər və təşkilatlar fələstinlilərə məxsus mülklərin sökülməsi və İsrail nəzarətinin genişləndirilməsi istiqamətində fəaliyyət göstəriblər.
Sanksiyaya məruz qalan digər qurumlar arasında Hashomer Yosh təşkilatı və onun rəhbəri Aviçay Suissa, eləcə də Amana kooperativi də yer alıb. Aİ bu qurumların Qərb sahilində onlarla zorakı məskunlaşma məntəqəsinin yaradılması və maliyyələşdirilməsində iştirak etdiyini iddia edir.
Analitiklər qeyd edirlər ki, bu qərar Avropa İttifaqının Qərb sahilində artan zorakılıq və insan hüquqları pozuntularına qarşı təzyiqləri artırmaq cəhdinin bir hissəsidir.
Son aylarda Qərb sahilində israilli məskunlaşmaçılar və fələstinlilər arasında qarşıdurmaların intensivləşməsi beynəlxalq ictimaiyyətin ciddi narahatlığına səbəb olub. Humanitar təşkilatlar bölgədə zorakılığın və məcburi köç hallarının artdığını bildirirlər.
