BAKI,VOA, Fərid Mikayılov

İsrail ordusu Livanın cənubunda hərbi əməliyyatların genişləndirilməsi çərçivəsində strateji əhəmiyyətə malik Şakif qalasını nəzarətə götürdüyünü bəyan edib.

VOA xəbər verir ki, son günlər Livanın cənubunda yerləşən Vadi Seluki və Şakif yüksəklikləri istiqamətində genişmiqyaslı əməliyyatlar həyata keçirilib.

Bildirilib ki, Litani çayına, Nəbatiyyə şəhərinə və ətraf yaşayış məntəqələrinə nəzarət imkanı verən strateji yüksəklikdə yerləşən Şakif qalası quru qoşunları tərəfindən ələ keçirilib.

Livanın mədəniyyət naziri Qassan Səlamə isə İsraili tarixi abidəni məqsədli şəkildə hədəfə almaqda ittiham edib. Nazir bildirib ki, qala hərbi nəzarətə götürülməzdən əvvəl intensiv hücumlara məruz qalıb və nəticədə tarixi tikilidə ciddi ziyan yarandığı ehtimal olunur.

Onun sözlərinə görə, davam edən hərbi əməliyyatlar səbəbindən mütəxəssislərin əraziyə göndərilməsi və ziyanın dəqiq qiymətləndirilməsi hələlik mümkün deyil.

Qassan Səlamə həmçinin qeyd edib ki, Livanın cənubundakı bir sıra tarixi bazarlar, kitabxanalar və arxeoloji ərazilər də son aylarda zərər görüb. O, ölkəsinin bu məsələ ilə bağlı UNESCO çərçivəsində araşdırma aparılması üçün müraciət edəcəyini bildirib.

Qeyd edək ki, Livan və İsrail arasında əldə olunmuş atəşkəs razılaşmasına baxmayaraq, tərəflər bir-birini pozuntularda ittiham edir. Regionda gərginlik isə hələ də davam edir.