BAKI,VOA,Yusif Şərifzadə
Bəhreyn Livanın suverenliyinə dəstəyini ifadə edərək ölkənin daxili işlərinə hər hansı xarici müdaxiləni qəbuledilməz hesab etdiyini bəyan edib.
VOA xəbər verir ki, Bəhreyn Xarici İşlər Nazirliyinin yaydığı bəyanatda Prezident Cozef Aunun dövlət hakimiyyətinin bütün Livan ərazisində möhkəmləndirilməsi və silahlara nəzarətin yalnız dövlətin əlində cəmləşdirilməsi istiqamətində apardığı siyasətə dəstək ifadə olunub.
Bəyanatda qeyd edilib ki, Bəhreyn rəhbərliyi Livan hökumətinin qeyri-dövlət silahlı qruplarının tərksilahını nəzərdə tutan Taif Sazişinin və Birləşmiş Millətlər Təşkilatı Təhlükəsizlik Şurasının 1701 saylı qətnaməsinin icrası istiqamətində atdığı addımları müsbət qiymətləndirir.
Manama həmçinin ABŞ Prezidenti Donald Trampın rəhbərliyi ilə həyata keçirilən vasitəçilik təşəbbüslərini alqışlayıb. Bəhreyn Livanda daimi atəşkəsin təmin olunmasına yönəlmiş səylərin vacibliyini vurğulayaraq, Livan hökumətinin hərbi əməliyyatların dayandırılması, mülki əhalinin qorunması və məcburi köçkünlərin geri qayıtmasının təmin edilməsi istiqamətindəki fəaliyyətini yüksək qiymətləndirib.
Nazirlik beynəlxalq və regional tərəfdaşları Livana göstərilən humanitar yardımların artırılmasına və Birləşmiş Millətlər Təşkilatının Livandakı Müvəqqəti Qüvvələrinə dəstəyin gücləndirilməsinə çağırıb.
