BAKI,VOA,Yusif Şərifzadə
İsrailin Baş naziri Benyamin Netanyahu bildirib ki, İsrail qoşunları ölkənin şimal sərhədlərinin təhlükəsizliyini təmin etmək məqsədilə Livanın cənubunda qalmağa davam edəcək.
VOA xəbər verir ki, bu barədə İsrail Baş nazirinin Ofisindəki yüksək vəzifəli rəsmiyə istinadən məlumat yayılıb.
Məlumata görə, Benyamin Netanyahu İsrail hərbçilərinin Livanın cənubunda "nə qədər lazım olarsa, o qədər qalacağını" vurğulayıb.
O bildirib ki, əsas məqsəd İsrailin şimal bölgələrinin təhlükəsizliyini təmin etməkdir.
Baş nazirin göstərişinə əsasən, İsrail ordusu Hizbullah tərəfindən həyata keçirilə biləcək istənilən hücuma sərt cavab verməlidir.
Netanyahu həmçinin orduya İsrail qüvvələrinə qarşı mövcud təhlükələrin aradan qaldırılması üçün tədbirlər görməyi tapşırıb.
Bu açıqlama Livanda atəşkəs ətrafında müzakirələrin davam etdiyi və tərəflərin bir-birini razılaşmaları pozmaqda ittiham etdiyi bir vaxtda səsləndirilib.
