BAKI,VOA, Fərid Mikayılov
Minlərlə livanlı ölkənin suverenliyinə təhdid olaraq dəyərləndirdikləri, ABŞ-nin vasitəçiliyi ilə İsrail arasında əldə olunan "çərçivə sazişi"nə etiraz etmək üçün müxtəlif şəhər və qəsəbələrdə küçələrə axışıb.
VOA xəbər verir ki, Beyrut və digər bölgələrdə alovlanan aksiyalar rəsmi hökumətin Vaşinqton tərəfindən dəstəklənən bu razılaşmanı elan etməsindən dərhal sonra başlayıb.
Etirazçılar paytaxtdakı hökumət binalarının yaxınlığında, Ramlet əl-Bayda və Səlim Salam rayonlarında əsas yolları bağlayaraq təkərlər yandırıblar. Mşərəfiyə və Beyrutun cənub ətraflarında (Dahiyə) təşkil olunan oturaq aksiyalarda İsrail rejimi ilə hər hansı birbaşa danışıqlara son qoyulması və sazişin təcili ləğv edilməsi tələb olunub.
Aksiyalar ABŞ dövlət katibi Marko Rubionun Livan və İsrail arasında razılığın əldə olunduğunu elan etməsindən sonra kritik həddə çatıb. İsrail tərəfi, o cümlədən Baş nazir Benyamin Netanyahu sazişi yüksək qiymətləndirərək İsrail ordusunun Livanın cənubunda yaradılan təhlükəsizlik zolağında qalacağını və livanlıların bu ərazilərə qayıtmasına icazə verilməyəcəyini bəyan edib. Livan xalqı isə bu şərtlərin İsrail işğalını qanuniləşdirdiyini bildirərək müqaviməti davam etdirəcəklərini vurğulayıb.
