BAKI,VOA, Fərid Mikayılov

İordaniya Silahlı Qüvvələri ölkənin hava hücumundan müdafiə sistemlərinin İrandan atılan beş raketi zərərsizləşdirdiyini açıqlayıb.

VOA xəbər verir ki, raketlər səhər saatlarında ölkə ərazisini hədəf alarkən aşkarlanıb və hava hücumundan müdafiə qüvvələri tərəfindən vurulub.

Bildirilib ki, insident nəticəsində heç bir insan tələfatı və ya maddi ziyan qeydə alınmayıb.

İordaniya Silahlı Qüvvələri bəyan edib ki, ölkənin hava məkanının, əhalisinin və milli təhlükəsizliyinin qorunması üçün bütün zəruri tədbirlər görülür. Həmçinin ordunun istənilən təhlükəyə qarşı yüksək döyüş hazırlığı vəziyyətində olduğu vurğulanıb.

Qeyd edək ki, ABŞ ilə İran arasında qarşıdurmanın davam etdiyi bir vaxtda Tehran bölgədə yerləşən ABŞ hərbi bazalarına cavab zərbələri endirdiyini bəyan edir.