İsrail qüvvələri İordan çayının qərb sahilinin Cenin bölgəsində yerləşən Yabad şəhərinə yeni basqın keçirib və şəhərin mərkəzində hərbi nəzarət məntəqəsi qurub. Əməliyyat zamanı sakinlərin şəxsiyyət sənədləri yoxlanılıb.

ArabAZ xəbər verir ki, Fələstinli Vəfa xəbər agentliyinin məlumatına görə, İsrail polisinin bir neçə avtomobili Yabad şəhərinin mərkəzinə daxil olaraq motosikletlə hərəkət edən bir neçə şəxsi təqib edib.

Daha sonra İsrail qüvvələri şəhərdə hərbi nəzarət məntəqəsi yaradıb və ərazidən keçən sakinləri saxlayaraq şəxsiyyət sənədlərini yoxlayıb.

Basqın Cenin vilayətində İsrail qüvvələrinin həyata keçirdiyi silsilə əməliyyatların davamı kimi qiymətləndirilir.

Bundan əvvəl İsrail ordusu Cenin bölgəsində bir neçə yaşayış məntəqəsinə basqınlar keçirib və üç nəfəri saxlayıb.

İordan çayının qərb sahilində İsrail qüvvələrinin əməliyyatları fonunda bölgədə gərginlik davam edir.