Mərakeş mediası İspaniya polisinin on minlərlə miqrantın Seutaya keçidi ilə bağlı hazırladığı hesabatı tənqid edib.

ArabAZ xəbər veri ki,İspaniya polisinin hesabatında Mərakeş təhlükəsizlik qüvvələrinin miqrant axınının qarşısını almaq üçün kifayət qədər tədbir görmədiyi və sərhəddə “tam dözümlülük” nümayiş etdirdiyi iddia olunur. Hesabata görə, bəzi polis əməkdaşları miqrantları suya doğru yönləndirib, sərhəd keçid məntəqəsinin yaxınlığında təhlükəsizlik qüvvələrinin sayı isə əvvəlki dövrlə müqayisədə xeyli az olub.

İyulun 30-31-də Mərakeşdən İspaniyanın Seuta ərazisinə 70 mindən çox miqrant keçib. Hadisə zamanı onlarla insan ölüb və miqrasiya məsələsi Avropa İttifaqında fikir ayrılıqlarına səbəb olub.

İspaniyanın Baş naziri Pedro Sançes isə dəfələrlə Mərakeşi hadisəni təşkil etməkdə ittiham etməkdən çəkinib və bununla bağlı “möhkəm sübutların” olmadığını bildirib. Madrid və Rabat son illərdə, xüsusilə Seuta və Melilyanın statusu məsələsində uzun müddət mürəkkəb münasibətlərə baxmayaraq, əlaqələri yaxşılaşdırmağa çalışır.

Mərakeş hakimiyyəti hesabatla bağlı hələlik açıqlama verməyib. Bununla belə, bir sıra Mərakeş media orqanları sənəddəki iddiaları tənqid edib. “Hespress” hesabatı maddi sübutlardan məhrum və ziddiyyətlərlə dolu adlandıraraq Mərakeşin İspaniyadakı siyasi və hüquqi mübahisələrdə “günah keçisi” kimi təqdim edilməyə çalışıldığını bildirib.

“Le Desk” hesabatı faktiki səhvlərə görə tənqid edib. “TelQuel” isə bəzi media orqanlarının hesabatı Mərakeşin miqrant axınını “planlaşdırmaq və həyata keçirməkdə” birbaşa ittiham etdiyi barədə məlumatların doğru olmadığını qeyd edib. “Medias24” isə “dözümlülük” iddiasının yalnız bir peyk görüntüsünə əsaslandığını bildirib.

Mərakeşli yüksək vəzifəli rəsmi də ötən ay anonimlik şərti ilə ölkənin təhlükəsizlik qüvvələrinin hadisə zamanı hər hansı nöqsana yol vermədiyini deyib.