Prezident İlham Əliyevlə Məsud Pezeşkian arasında telefon danışığı olub

Azərbaycan və İran arasında yüksək səviyyəli siyasi təmaslar davam edir. Azərbaycan Prezidenti İlham Əliyev ilə İran Prezidenti Məsud Pezeşkian arasında baş tutan telefon danışığında qarşılıqlı təbriklər, humanitar dəstək məsələləri və ikitərəfli əlaqələrin gələcək inkişaf perspektivləri müzakirə olunub. Söhbət zamanı tərəflər iki ölkə arasında münasibətlərin əhəmiyyətini vurğulayıb və qarşılıqlı dəstəyin davam etdirilməsi ilə bağlı mesajlar səsləndiriblər. Müşahidəçilər hesab edirlər ki, regionda mürəkkəb geosiyasi proseslərin davam etdiyi dövrdə Bakı və Tehran arasında yüksək səviyyəli təmaslar xüsusi əhəmiyyət daşıyır.

26 May 2026 19:06

BAKI,VOA

Mayın 26-da Azərbaycan Respublikasının Prezidenti İlham Əliyevlə İran İslam Respublikasının Prezidenti Məsud Pezeşkian arasında telefon danışığı olub.

VOA xəbər verir ki, bu barədə Prezidentin Mətbuat Xidməti məlumat yayıb.

Dövlət başçıları müqəddəs Qurban bayramı münasibətilə bir-birlərinə təbriklərini çatdırıb, Azərbaycan və İran xalqlarına firavanlıq və ruzi-bərəkət arzulayıblar.

İran İslam Respublikasının Prezidenti ölkəsinin üzləşdiyi ağır günlərdə Azərbaycanın göstərdiyi humanitar yardımlara görə bir daha təşəkkürünü bildirib.

Prezident İlham Əliyev öz növbəsində qeyd edib ki, Azərbaycan və İran yaxşı günlərdə də, ağır günlərdə də hər zaman bir-birinin yanındadır.

Telefon söhbəti zamanı ikitərəfli əlaqələrin inkişafı və perspektivləri barədə fikir mübadiləsi aparılıb.