İraq hökuməti Türkiyə ilə imzalanmış "su müqabilində neft" razılaşması çərçivəsində bu ölkəyə göndərilən xam neftin həcmini məhdudlaşdırıb. Baş nazir Əli Faleh əz-Zeydinin sədrliyi ilə keçirilən Nazirlər Kabinetinin iclasında qəbul edilən qərara əsasən, Türkiyəyə göndərilən gündəlik neftin həcmi maksimum 33 min barel olaraq müəyyənləşdirilib.

Hökumətin bu addımı atmaqda əsas məqsədi neft həcmlərini türk podratçı şirkətlərinin İraqda həyata keçirdiyi su və suvarma layihələrinin real xərclərinə uyğunlaşdırmaqdır. Beləliklə, layihələrin dəyərindən artıq neftin xaricə çıxarılmasının qarşısı alınır, eyni zamanda ölkənin beynəlxalq bazarlara çıxardığı əsas neft ehtiyatları qorunur.

Xatırladaq ki, sözügedən müqavilə Dəclə və Fərat çaylarında kəskin su qıtlığı və quraqlıqla mübarizə aparmaq üçün 2025-ci ilin noyabrında imzalanıb. Razılaşmaya görə, İraq neftinin satışından gələn vəsait birbaşa türk mütəxəssislərinin İraqda qurduğu suvarma şəbəkələrinə, su kanallarının yenilənməsinə və bəndlərin təmirinə yönəldilir. Bunun müqabilində isə Türkiyə öz su anbarlarından İraqa axan suyun həcminə rəsmi zəmanət verir.

İclasda həmçinin Hörmüz boğazında gəmi hərəkətində yaranan problemlər və tanker təhlükəsizliyi məsələsi müzakirə edilib. Hökumət dənizdə sabitlik təmin olunana qədər neft və neft məhsullarının alternativ və təcili satış mexanizmlərinin qüvvədə qalması müddətini uzadıb.

Bununla yanaşı, İraq Neft Nazirliyinə ABŞ-nin məşhur "Chevron" enerji nəhəngi ilə böyük kommersiya sazişi imzalamaq səlahiyyəti verilib. Bu müqavilə İraqa neft üçün qabaqcadan ilkin ödəniş almaq və texniki məsləhət xidmətlərindən faydalanmaq imkanı qazandıracaq.

Daxili yanacaq bazarını qorumaq üçün isə Maliyyə Nazirliyinə tapşırılıb ki, dövlət müəssisələri və ictimai binaların yanacaq ehtiyacını ödəmək məqsədilə hər ay Neft Nazirliyinə birbaşa vəsait köçürsün.

Bağdad rəhbərliyi bu addımlarla həm büdcədə nağd pul çatışmazlığını həll etməyi, həm dəniz yollarındakı gərginlik fonunda ixrac kanallarını sığortalamağı, həm də ölkənin ən ağrılı problemi olan su çatışmazlığını nəzarətdə saxlamağı hədəfləyir.