BAKI, AzerVoice
Avropa Komissiyasının sədri Ursula fon der Leyen Brüsseldə keçirdiyi mətbuat konfransında Avropa İttifaqının (Aİ) yeni müdafiə paketi və yenidən silahlanma planını təqdim edib.
AzerVoice xəbər verir ki, O, dünyanın təhlükəli bir dövrdən keçdiyini vurğulayaraq, Avropanın hazırlıqsız qalması halında ciddi fəlakətlərlə üzləşə biləcəyini bildirib. Fon der Leyen Avropanın təhlükəsizliyinin real təhdid altında olduğunu və qitənin öz təhlükəsizliyinə daha çox cavabdehlik daşımalı olduğunu qeyd edib.
Avropanın sürətli və qətiyyətli şəkildə hərəkət etməsinin vacibliyini bildirən fon der Leyen, "Biz yenidən silahlanma dövründəyik. Avropa müdafiə xərclərini əhəmiyyətli dərəcədə artırmağa hazırdır" deyib.
O, qısamüddətli perspektivdə Ukraynaya dəstəyin davam etdirilməsinin, uzunmüddətli perspektivdə isə Avropanın təhlükəsizliyi üçün daha çox məsuliyyət götürməsinin zəruriliyini vurğulayıb. Bu çərçivədə fon der Leyen Aİ liderlərinə məktub ünvanlayaraq, onları Avropanın yenidən silahlanma planını dəstəkləməyə çağırıb.
Fon der Leyen Avropa ölkələrinin müdafiə xərclərini artırması üçün maliyyə qaydalarının yumşaldılacağını və Aİ-nin bu xərcləri məhdudlaşdıran maliyyə tələblərindən istisna ediləcəyini açıqlayıb.
O qeyd edib ki, əgər Aİ ölkələri müdafiə xərclərini ÜDM-lərinin 1,5%-i səviyyəsində artırsalar, dörd il ərzində bu sahəyə 650 milyard avro əlavə vəsait yönəldilə bilər.
Aİ-nin yeni silahlanma planı çərçivəsində üzv dövlətlərə 150 milyard avroluq müdafiə krediti ayrılacaq. Bu kredit hava və raket hücumlarından müdafiə, artilleriya sistemləri, döyüş sursatları, dronlar və dron əleyhinə sistemlər kimi texnologiyaların inkişafını maliyyələşdirəcək.
Fon der Leyen bu addımın Aİ ölkələrinə birlikdə silah almaq və Ukraynaya təcili hərbi yardım göstərmək imkanını artıracağını bildirib.
Planın üçüncü mərhələsi Aİ büdcəsindən müdafiə sektoruna vəsait ayırmaqdır. Fon der Leyen üzv ölkələrə müdafiə xərclərini artırmaq üçün müxtəlif maliyyə mexanizmləri təqdim ediləcəyini və Avropa Yatırım Bankası vasitəsilə daha çox özəl kapitalın cəlb ediləcəyini açıqlayıb.
Onun sözlərinə görə, bu plan ümumilikdə 800 milyard avroluq müdafiə xərclərini hərəkətə keçirə bilər.
Qeyd edək ki, 6 martda Brüsseldə Ukrayna və müdafiə məsələlərinin müzakirəsi üçün Aİ-nin fövqəladə Liderlər Zirvəsi keçiriləcək.
