BAKI,VOA, Həcər Nazarova
ABŞ Prezidenti Donald Tramp Rusiyanın NATO ərazisinə hücum etməyəcəyini bildirib.
VOA xəbər verir ki, Tramp cümə axşamı Oval kabinetdə jurnalistlərin suallarını cavablandırarkən Rusiya Prezidenti Vladimir Putinin belə bir öhdəlik götürüb-götürmədiyi barədə suala “Onunla yaxşı danışıqlar apardım. O, NATO ərazisinə hücum etməyəcək” cavabını verib.
Trampın açıqlaması Mərkəzi Kəşfiyyat İdarəsinin (MKİ) direktoru Con Retkliffin Moskvaya gözlənilməz səfərindən iki gün sonra səslənib. ABŞ mediasının məlumatına görə, səfərin məqsədlərindən biri Rusiyanı NATO ölkələrinə qarşı mümkün hücumdan çəkindirmək olub.
Bununla yanaşı, Avropa İttifaqının yüksəkvəzifəli rəsmisi Avropa kəşfiyyat xidmətlərinin Rusiyanın Avropadakı NATO ölkələrinə hərbi hücum hazırladığına dair əlamət görmədiyini bildirib.
