BAKI, AzerVoice
Avropa İttifaqı Rusiyaya qarşı 17-ci sanksiya paketini hazırlayır.
AzerVoice xəbər verir ki, Avropa
Komissiyasının sədri Ursula fon der Leyen Rusiyaya qarşı yeni
sanksiya paketi hazırlandığını açıqlayıb.
O, Albaniyada keçirilən Avropa Siyasi Birliyinin Zirvə Toplantısı
öncəsi çıxış edərək Moskvanın təzyiqlərə daha çox məruz qalacağını
bildirib.
Fon der Leyen Avropa Siyasi Birliyinin Rusiya-Ukrayna müharibəsinin başlanması ilə yaradıldığını və bu formatın Avropa qitəsində sabitliyin təmin olunmasına xidmət etdiyini vurğulayıb. O, həmçinin Rusiya prezidenti Vladimir Putinin Türkiyədə birbaşa görüş təklif etməsinə baxmayaraq, danışıqlarda iştirak etmədiyini, Ukrayna prezidenti Volodimir Zelenskinin isə buna hazır olduğunu xatırladıb. “Bu, prezident Putinin sülh istəmədiyini göstərir. Ona görə də təzyiqi artırmalıyıq” - deyə o vurğulayıb.
Yeni hazırlanan sanksiyalar paketinə “Şimal axını 1 və 2” layihələrinə sanksiyalar, Rusiyanın kölgə donanmasından daha çox gəminin siyahıya alınması, Rusiya neftinin qiymətinin daha da aşağı salınması və maliyyə sektoruna yeni məhdudiyyətlər daxildir.
Von der Leyen bildirib ki, Aİ-nin əsas prioriteti sülhün bərqərar olunmasıdır, lakin bu məqsədə çatmaq üçün Moskva üzərində təzyiqlər gücləndirilməlidir.
Xatırladaq ki, Avropa İttifaqı indiyədək Rusiya Federasiyasına qarşı 16 sanksiya paketi tətbiq edib. Bu paketlər çərçivəsində ticarət, maliyyə, enerji (xüsusilə neft və kömür), sənaye, texnologiya və nəqliyyat sektorlarına, həmçinin lüks mallar, qızıl və almaz ticarətinə ciddi məhdudiyyətlər qoyulub. Bundan əlavə, bəzi Rusiya bankları SWIFT sistemindən çıxarılıb, bir sıra Rusiya media qurumlarının fəaliyyəti dayandırılıb. Sanksiya siyahısında hazırda 2000-dən çox şəxs və qurum yer alır.
