BAKI, AzerVoice
Venesuelada növbəti parlament və qubernator seçkiləri keçiriləcək.
AzerVoice-un məlumatına görə, təxminən 21,5 milyon seçici yerli hakimiyyət orqanlarında kimlərin təmsil olunacağını müəyyənləşdirəcək. Ümumilikdə 54 partiya, siyasi və ictimai hərəkat, təşkilat namizədlər irəli sürüb.
Venesuela vətəndaşları bu seçkilərdə 285 nəfərlik Milli Assambleyanın (birpalatalı parlament) deputatlarını, 24 qubernatoru və 260 qanunverici şura üzvünü seçəcəklər. İlk dəfə olaraq bu seçkilər Qayana ilə mübahisəli ərazi sayılan və ötən ilin aprel ayında ölkənin 24-cü ştatı kimi yaradılan Qayana-Esekibo bölgəsində də keçiriləcək. Yeni ştatda bir qubernator, səkkiz Milli Assambleya deputatı və yeddi qanunverici şura üzvü seçiləcək.
Venesuela Milli Seçki Şurası (CNE) 10 may tarixində seçkilərin planlı məşqini keçirib. Elektron səsvermə texnologiyası ilə tanış olmaq üçün bir çox vətəndaş bu məşqdə iştirak edib. CNE sədr müavini Karlos Kinteronun verdiyi məlumata görə, səsvermə günü ölkə üzrə 15 min 736 seçki mərkəzi və 27 min 713 elektron səsvermə məntəqəsi fəaliyyət göstərəcək. Seçki məntəqələri yerli vaxtla saat 06:00-da açılacaq və saat 18:00-da bağlanacaq. Əgər bağlanma vaxtında hələ də növbələr olacaqsa, CNE-nin qərarı ilə səsvermə müddəti uzadıla bilər.
Hinterlaces ictimai rəy sorğusunun nəticələrinə görə, seçicilərin 60 faizi, hakim Venesuela Birləşmiş Sosialist Partiyasının rəhbərlik etdiyi "Böyük Vətənpərvər Qütb" blokunun namizədlərinə səs verməyi planlaşdırır. Müstəqil namizədləri 15 faiz, müxalifət namizədlərini isə 5 faiz dəstəkləyir. Seçicilərin 20 faizi isə hələ qərar verməyib.
