BAKI, AzerVoice
Melonidən İsrailin Qəzza əməliyyatlarına sərt reaksiya - Qəbuledilməz ölçülərə çatıb.
AzerVoice xəbər verir ki, İtaliyanın baş naziri Giorgia Meloni İsrailin Qəzzaya qarşı hərbi əməliyyatlarının qəbuledilməz həddə çatdığını və dərhal dayandırılaraq mülki əhalinin qorunmalı olduğunu bildirib.
“İsrailin reaksiyası qəbuledilməz səviyyəyə yüksəlib. Həmas bölgədə müharibə başlatmış olsa da, cavab tədbirləri mülki əhalini qoruyacaq şəkildə həyata keçirilməlidir.” - deyə Meloni bildirib.
Baş nazir, İtaliyanın Qəzza xalqına ən çox humanitar yardım edən ölkələrdən biri olduğunu vurğulayıb. Eyni zamanda Körfəz ölkələri və ərəb dövlətlərinin Yaxın Şərqdəki böhranın əsas iştirakçıları olduğuna inandığını ifadə edib.
Meloni çıxışında Rusiya-Ukrayna müharibəsinə də toxunaraq,
“ABŞ prezidenti Donald Trampın Ukraynanın NATO-ya üzvlüyünün gündəmdə olmadığını bildirməsi və Rusiyanın beynəlxalq sistemə reinteqrasiya ehtiyacından bəhs etməsi fonunda Moskvanın barışa doğru real addımlar atması gözlənilirdi. Lakin əksinə, Rusiya sülh əvəzinə təbliğat məqsədli danışıqlar və mülki hədəflərə hücumlarla cavab verir.” - deyə qeyd edib.
İtaliyanın böyük iqtisadi güc olduğunu bildirən Meloni, ölkəsinin Avropa İttifaqında “Fransa və Almaniyanın ehtiyat təkəri olmamaq” mövqeyini qoruduğunu deyib.
İtaliya baş naziri daxili siyasətlə bağlı məsələlərə də toxunaraq, əcnəbilərə vətəndaşlıq verilməsi üçün tələb olunan 10 illik fasiləsiz yaşayış müddətinin 5 ilə endirilməsi barədə referendumla bağlı iştirak etməyəcəyini bəyan edib.
“İtaliyada vətəndaşlıq qanunu çox yaxşı işləyir. Hər il Avropada ən çox vətəndaşlıq verən ölkələrdən biri oluruq. Lakin vətəndaşlıq hüququ ilə bağlı bürokratik proseslərin sadələşdirilməsi istiqamətində işlər aparılır.” - deyə o qeyd edib.
