BAKI, AzerVoice
Ruanda, Mərkəzi Afrika Dövlətləri İqtisadi Birliyindən (ECCAS) ayrıldığını rəsmi olaraq elan edib.
AzerVoice xəbər verir ki, bu barədə Ruanda Xarici İşlər Nazirliyinin verdiyi yazılı açıqlamada deyilir.
Açıqlamada, Ruandanın bəzi üzv dövlətlərin dəstəyi ilə Konqo Demokratik Respublikasının (KDR) ECCAS-ı öz məqsədlərinə uyğun istifadə etməsini pislədiyi bildirilib.
Açıqlamada, həmçinin, ECCAS-ın, dünən Ekvator Qvineyasının paytaxtı Malabo şəhərində keçirilən 26-cı Zirvə toplantısına diqqət çəkilərək, bu toplantıda Konqonun tələblərini qəbul etmək üçün Ruandanın növbəli prezidentlik haqqının "qəsdən" görməzdən gəlindiyi iddia edilib.
"Fəaliyyətləri artıq prinsiplərinə və faydalılığına zidd olan bir təşkilatda üzvlüyünü davam etdirmək üçün heç bir səbəb görmürük" - deyə, açıqlamada bildirilib.
Qeyd edək ki, 1983-cü ildə bölgədəki sülh, təhlükəsizlik, iqtisadi inteqrasiya və inkişafı təşviq etmək məqsədilə qurulan təşkilatda 11 ölkə iştirak edir.
Ruanda 2007-ci ildə təşkilatdan çıxmış, ancaq 2016-cı ildə yenidən üzv olmuşdu.
Həmçinin onu da qeyd edək ki, son illərdə Ruanda ilə Konqo arasında Şərqi Konqoda baş verən təhlükəsizlik böhranları və üsyançı qrupların dəstəkləndiyi iddiaları səbəbindən ciddi diplomatik gərginliklər yaranıb.
