BAKI, AzerVoice

İtaliyanın baş naziri Giorgia Meloni Yaxın Şərq böhranı ilə bağlı beynəlxalq liderlərlə məsləhətləşmələr aparıb.

AzerVoice xəbər verir ki, İtaliyanın baş naziri Giorgia Meloni Yaxın Şərqdəki gərgin vəziyyətlə bağlı ABŞ, Avropa İttifaqı və Orta Şərq ölkələrinin liderləri ilə telefon danışıqları aparıb.

Meloni bu danışıqlarda bölgədəki humanitar böhran və İranın nüvə silahına malik olmaması zərurətini vurğulayıb.

Baş nazir Meloni ABŞ Prezidenti Donald Tramp, Almaniya kansleri Fridrix Merz, Aİ Komissiya sədri Ursula von der Leyen, Səudiyyə Ərəbistanının vəliəhdi Məhəmməd bin Salman, İordaniya kralı II Abdullah, Oman sultanı və Birləşmiş Ərəb Əmirliklərinin liderləri ilə fikir mübadiləsi aparıb. O, həmçinin İsrailin baş naziri Benyamin Netanyahu ilə də birbaşa əlaqə saxlayıb.

Meloni bildirib ki, İtaliya əvvəllər İran və ABŞ arasında keçirilmiş iki nüvə danışıqlarına ev sahibliyi etdiyi kimi, diplomatik səylərə yenidən dəstək verməyə və vasitəçilik rolunu üzərinə götürməyə hazırdır.

Telefon danışığında o, Netanyahuya “İranın heç bir halda nüvə silahı əldə etməməli olduğunu” xatırladıb, həmçinin Qəzza zolağında mülki əhaliyə humanitar yardımın dərhal təmin edilməsinin vacibliyini vurğulayıb.

Qeyd edək ki, iyunun 13-də İsrailin İranın müxtəlif şəhərlərindəki nüvə obyektlərinə həyata keçirdiyi hücumlar nəticəsində İran ordusunun yüksək rütbəli komandirləri və 9 nüvə alimi həlak olub. İnsidentdən sonra İran İsrailə ballistik raketlərlə cavab verib, nəticədə azı 63 nəfər yaralanıb. Hadisələr beynəlxalq narahatlıq doğurub və bir sıra ölkələr, o cümlədən Türkiyə, İsraili qınayıb.