BAKI, AzerVoice
İsrailin müharibə planında əsas hədəf- Fordo nüvə obyektidir.
AzerVoice xəbər verir ki, İranla hərbi
qarşıdurmanın dördüncü günündə İsrailin əsas narahatlığı Fordo nüvə
obyektini hədəfə almaq planıdır.
Təl-Əviv, dağın 1 kilometr dərinliyində yerləşən və İranın nüvə
proqramının əsası sayılan bu obyektin məhv edilməməsi halında bütün
hərbi əməliyyatların mənasız qalacağını bildirir.
İsrailin F-35 təyyarələri ilə Tehrana, Təbrizə və İsfahana hücumlarına cavab olaraq İran da Tel-Əviv, Yaffa və Bat Yamı ballistik raketlərlə vurub. Münaqişə zamanı qarşılıqlı olaraq neft emalı zavodları hədəfə alınsa da, İsrailin əsas məqsədi – Fordo uran zənginləşdirmə qurğusu – toxunulmaz qalıb.
İsrailin Fordoya hücum etmək imkanlarının məhdud olduğu vurğulanır. Tel-Əvivin hazırda bu səviyyədə dərinliyi hədəfə ala biləcək nə “bunker buster” bombaları, nə də ağır bombardmançı təyyarələri var. Axios saytının təhlilində qeyd edilir ki, bu hədəfə çatmaq üçün ya “taktiki möcüzə” baş verməlidir, ya da ABŞ əməliyyata birbaşa dəstək verməlidir.
“Bütün bu əməliyyat Fordonun sıradan çıxarılması ilə nəticələnməlidir.” - deyə İsrailin ABŞ-dakı səfiri Yechiel Leiter Fox News-a bildirib. Ancaq hazırkı mərhələdə ABŞ prezidenti Donald Tramp administrasiyası hərbi müdaxilə mövzusunda ehtiyatlı davranır. Ağ Evdən verilən açıqlamada əməliyyata qoşulmaq məsələsinin təsdiqlənmədiyi bildirilib.
Qeyd edək ki, Tehrandan 160 km cənubda, Qum şəhəri yaxınlığında yerləşən Fordo nüvə obyektinin varlığı 2009-cu ildə aşkar edilib. 2015-ci ildə imzalanan nüvə sazişinə əsasən obyekt tədqiqat mərkəzinə çevrilməli idi, lakin Trampın 2018-ci ildə sazişdən çıxması ilə İran uranı zənginləşdirmə fəaliyyətlərini bərpa edib.
MAQATE-nin son hesabatında İranın 60% zənginləşdirilmiş urana sahib olduğu və 90%-ə çatarsa, altı nüvə bombası istehsal edə biləcəyi qeyd olunub. Mütəxəssislər bu qədər zənginləşdirilmiş uranın dinc məqsədlər üçün istifadə edilməsinin real olmadığını bildirirlər.
Onu da qeyd edək ki, İsrail rəsmiləri ABŞ-ın dəstəyini almadan Fordo kimi strateji bir obyektə müdaxilə edə bilməyəcəklərini etiraf edirlər. Əgər Vaşinqton yaxın günlərdə əməliyyata dəstək verməzsə, İsrailin atəşkəsi qəbul etməkdən başqa alternativi qalmaya bilər.
