BAKI, AzerVoice
Amerikanın "Tesla" şirkətinin səhmləri Nasdaq elektron birjasında keçirilən ilkin ticarət sessiyası zamanı İlon Mask ilə ABŞ prezidenti Donald Tramp arasında baş verən qalmaqal fonunda təxminən 8 faiz dəyər itirib.
AzerVoice xəbər verir ki, bu barədə birja məlumatları göstərir.
Belə ki, Bakı vaxtı ilə saat 03:59-da "Tesla" səhmləri 3,85 faiz azalaraq bir səhm üçün 311,16 dollar səviyyəsinə düşüb. Saat 16:07-də isə qiymətlər daha da enərək 297,8 dollara qədər geriləyib ki, bu da 7,98 faiz azalma deməkdir.
Xatırladaq ki, Mask Trampın dövlət xərclərinin azaldılmasına dair qanun layihəsini tənqid edərək, ABŞ-da yeni siyasi partiyanın yaradılması ideyasını irəli sürmüşdü. O, X sosial şəbəkəsində bu partiyanın “Amerika Partiyası” adlandırıla biləcəyini təklif etmişdi.
Mask, bundan əvvəl ABŞ federal hökumətində səmərəliliyin artırılması üzrə departamentin (DOGE) koordinatoru və xüsusi statuslu ictimai əsaslarla çalışan dövlət qulluqçusu olub. O, faktiki olaraq Trampın ən yaxın çevrəsində yer alırdı. Lakin ABŞ mediasında yayımlanan məlumatlara görə, son həftələrdə aralarındakı münasibətlər Maskın biznes maraqları və bir sıra səbəblərdən pozulmağa başlayıb. Maskın dövlət qulluqçusu kimi fəaliyyətinə son verməsindən sonra tərəflər sosial şəbəkələr vasitəsilə bir-birlərinə qarşı açıq şəkildə tənqidi mövqelər nümayiş etdirməyə başlayıblar.
Sonradan Mask Trampa qarşı sərt açıqlamalar verdiyinə görə peşman olduğunu bildirib. “The New York Times” qəzetinin yazdığına görə, Mask bu bəyanatı X sosial şəbəkəsində paylaşmazdan əvvəl, iyunun 11-də Trampla telefon danışığı aparıb. İyunun 28-də isə Mask, Trampın dövlət xərclərinin azaldılmasına dair qanun layihəsini Senatda səsverməyə çıxarılmazdan öncə bir daha açıq şəkildə tənqid edib.
