BAKI, AzerVoice

ABŞ Birləşmiş Millətlər Təşkilatından (BMT) Françeska Albanesenin Fələstin əraziləri üzrə xüsusi məruzəçi vəzifəsindən azad edilməsini tələb edib.

AzerVoice xəbər verir ki, bu barədə "Free Beacon" portalı məlumat yayıb.

Məlumata görə, Ağ Ev Albaneseni terrorizmi dəstəkləməkdə və antisemitizmdə ittiham edir, həmçinin onun beynəlxalq hüquq üzrə lazımi ixtisasa malik olmadığını iddia edir.

ABŞ-ın BMT-dəki müvəqqəti işlər vəkili Doroti Şi tərəfindən göndərilən məktubda deyilir: “Onun fəaliyyəti beynəlxalq hüququn normalarını pozur və xüsusi məruzəçi mandatını nüfuzdan salır.”

BMT Baş katibinin ofisi isə ABŞ-a cavab olaraq bildirib ki, xüsusi məruzəçiləri vəzifədən yalnız BMT-nin İnsan Haqları Şurası uzaqlaşdıra bilər.

Qeyd edək ki, fevral ayında ABŞ prezidenti Donald Tramp bəyan etmişdi ki, fələstinlilər qonşu ölkələrə köçürüldükdən sonra ABŞ Qəzza zolağında nəzarəti öz üzərinə götürəcək. Tramp vəd etmişdi ki, ABŞ həmin regionun bərpası və iş yerlərinin yaradılmasına cavabdeh olacaq.