BAKI, AzerVoice
Avropa İttifaqı (Aİ) ABŞ-ın tətbiq etdiyi tarif artımına cavab tədbirləri hazırlayıb, lakin hazırkı mərhələdə bu tədbirləri tətbiq etməyəcək və məsələnin danışıqlar yolu ilə həllinə üstünlük verəcək.
AzerVoice xəbər verir ki, bu barədə Avropa Komissiyasının rəhbəri Ursula fon der Lyayen bildirib.
“Biz ilk gündən qarşı tədbirlərin hazırlanması üzərində çalışmışıq və indi cavab verməyə hazırıq. Zərurət yarandığı halda buna tam hazır vəziyətdəyik” – deyə, fon der Lyayen qeyd edib.
Eyni zamanda o vurğulayıb ki, Aİ məsələni dialoq vasitəsilə həll etməyə üstünlük verir. Fon der Lyayen qeyd edib ki, ABŞ Brüsselə əgər razılaşdırılmış həllin əldə olunmagığı təqdirdə qüvvəyə minəcək tədbirlərin siyahısını əks etdirən məktub göndərib.
Onun sözlərinə görə, Avropa İttifaqı avqustun əvvəlinə qədər cavab tədbirlərini tətbiq etməyəcək, lakin hazırlıqları davam etdirəcək.
Qeyd edək ki, 12 iyul tarixində ABŞ prezidenti Donald Tramp avqustun 1-dən etibarən Aİ və Meksikadan gətirilən məhsullara 30 faiz həcmində idxal rüsumları tətbiq ediləcəyini açıqlayıb. Onun sözlərinə görə, əgər həmin ölkələr də cavab tədbirləri görərsə, ABŞ bu tariflərə əlavə faizlər də əlavə edəcək.
