BAKI, AzerVoice

Qətər və Misir vasitəçiləri İsrail ilə HƏMAS arasında atəşkəsə nail olmaq məqsədilə çərçivə sazişinin əldə olunması üçün məsləhətləşmələri davam etdirirlər.

AzerVoicexəbər verir ki, bu barədə Qətər baş nazirinin müşaviri və ölkənin Xarici İşlər Nazirliyinin rəsmi nümayəndəsi Məcid bin Məhəmməd əl-Ənsari brifinq zamanı məlumat verib.

“Hazırda atəşkəslə bağlı danışıqlar birinci mərhələdədir və əsas məqsəd prinsiplər üzərində razılığın əldə olunmasıdır” – deyə, o bildirib. Əl-Ənsari qeyd edib ki, vasitəçilər qarşıdurma tərəfləri arasında çərçivə razılaşmasına nail olmağa çalışırlar.

“Bu razılaşma dolayı danışıqların başlanması üçün əsas olacaq. Həmin danışıqların məqsədi isə atəşkəs razılaşmasının əldə olunmasıdır. Biz hələlik birinci mərhələdəyik. İkinci mərhələnin nəticəsi atəşkəs razılaşması olacaq, sonrakı mərhələdə isə Qəzza zolağında davamlı sülh əldə olunacaq” – deyə, Qətər rəsmisi vurğulayıb.