BAKI, AzerVoice
Ukraynanın xarici işlər naziri Andriy Sibiha “İrandan gələn təhdidləri aradan qaldırmaq üçün” İsraillə strateji dialoqa başlamaq qərarına gəlib.
AzerVoice xəbər verir ki, Ukraynanın xarici işlər naziri Andriy Sibiha, ölkəsində rəsmi görüşlər keçirən İsrailin xarici işlər naziri Gideon Saar ilə paytaxt Kiyevdə görüşüb. Xarici İşlər Nazirliyində keçirilən ikitərəfli danışıqlardan sonra Sibiha və israilli həmkarı birgə mətbuat konfransı keçirib.
Rusiyanın Ukraynaya qarşı müharibəsində İranı dəstəklədiyini qeyd edən Sibiha, İranın İsrail və Ukrayna üçün təhdid olduğunu bildirib.
"Bu gün ölkələrimiz ümumi təhlükəsizlik problemləri ilə üz-üzədir. İran və Rusiya təkcə ölkələrimiz üçün deyil, həm də qlobal təhlükəsizliyə ekzistensial təhlükə yaradır. İran nüvə proqramını inkişaf etdirməklə və terrorçu qruplaşmaları silahla təmin etməklə regionda sabitliyi pozmaqda davam edir" - deyə o qeyd edib.
Sibiha bildirib ki, Ukraynanın İsraillə tibb, enerji, kənd təsərrüfatı və kibertəhlükəsizlik kimi sahələrdə əməkdaşlığı dərinləşdirmək üçün mühüm imkanlar mövcuddur.
"Ukrayna və İsrailin müdafiə texnologiyaları sahəsində əhəmiyyətli potensialı var. Dövlətlərimizin təhlükəsizliyi və sabitliyi üçün bunu birlikdə həyata keçirməyin vaxtı çatıb"- deyə o qeyd edib.
