Qətər Böyük Britaniyanın işğal olunmuş İordan çayının qərb sahilindəki İsrail yaşayış məntəqələrindən mənşə alan mallara ticarət qadağası tətbiq etməsini alqışlayıb.
ArabAZ xəbər verir ki, Qətərin Xarici İşlər Nazirliyi çərşənbə axşamı yaydığı bəyanatda bu addımı İsrailin beynəlxalq hüquqa zidd yaşayış məntəqələri siyasətinin qarşısının alınmasına yönəlmiş səyləri dəstəkləyən mühüm addım kimi qiymətləndirib.
Qətər Xarici İşlər Nazirliyi bildirib ki, İsrailin işğal olunmuş Fələstin ərazilərində yaşayış məntəqələri salmaq siyasəti beynəlxalq hüququn və beynəlxalq legitimliyə dair qətnamələrin açıq şəkildə pozulmasıdır.
Bəyanatda xüsusilə BMT Təhlükəsizlik Şurasının 2334 saylı qətnaməsinə və Roma Statutunun 8-ci maddəsinə istinad edilib.
Qətər qeyd edib ki, İsrailin yaşayış məntəqələri siyasəti Fələstin xalqının hüquqlarına açıq müdaxilə olmaqla yanaşı, iki dövlətli həllə nail olmaq istiqamətində aparılan səylərə də zərər vurur.
Doha bir sıra ölkələrin də bu təşəbbüsə qoşulmaq və ya milli prosedurlarına uyğun olaraq oxşar tədbirləri nəzərdən keçirmək niyyətini alqışlayıb.
Qətərin Xarici İşlər Nazirliyi hesab edir ki, bu cür addımlar iki dövlətli həllin həyata keçirilməsinə yönəlmiş beynəlxalq səylərin praktik nəticəyə çevrilməsini və İsrailin yaşayış məntəqələri siyasətini dayandırmasına təzyiq göstərilməsini təmin edə bilər.
Bəyanatda son dövrdə bir sıra ölkələrin müstəqil Fələstin dövlətini tanımasının beynəlxalq dəstəyin artmasına və Fələstin dövlətinin ərazidə faktiki şəkildə formalaşdırılması istiqamətində prosesin güclənməsinə töhfə verdiyi vurğulanıb.
Qətər daha çox ölkənin İsrail yaşayış məntəqələrindən gələn mallara qarşı oxşar tədbirlər görəcəyinə ümid etdiyini bildirib.
Doha beynəlxalq ictimaiyyəti İsraili işğal olunmuş Fələstin ərazilərində yaşayış məntəqələri siyasətini dayandırmağa və beynəlxalq hüquq normalarına, eləcə də beynəlxalq legitimliyə dair qətnamələrə hörmət etməyə məcbur etmək üçün hüquqi və mənəvi məsuliyyətini yerinə yetirməyə çağırıb.
Qətər Xarici İşlər Nazirliyi Fələstin məsələsinə və Fələstin xalqının hüquqlarına dəyişməz dəstəyini də bir daha təsdiqləyib.
Qətər Fələstin xalqının 1967-ci il sərhədləri əsasında, paytaxtı Şərqi Qüds olmaqla müstəqil dövlət yaratmaq hüququnu dəstəklədiyini bildirib.
