Qətər Turizminin sədri Səad bin Əli əl-Xarci Körfəz ölkələrinin turizm sektorunun dayanıqlılığının gücləndirilməsinin və mövcud əməkdaşlıqdan daha inteqrasiya olunmuş, rəqabətqabiliyyətli turizm sisteminə keçidin vacibliyini bildirib.
ArabAZ xəbər verir ki, əl-Xarci Bəhreynin paytaxtı Manamada keçirilən Körfəz Əməkdaşlıq Şurasına (KƏŞ) üzv ölkələrin turizm rəsmilərinin 10-cu nazirlər toplantısında çıxışı zamanı birgə turizm paketlərinin hazırlanmasına, vahid Körfəz turizm vizasının tətbiqinin sürətləndirilməsinə və əsas beynəlxalq bazarlarda ortaq tanıtım kampaniyalarının genişləndirilməsinə çağırıb.
Onun sözlərinə görə, bu addımlar turistlərin Körfəz ölkələri arasında hərəkətini asanlaşdırmaqla yanaşı, regionun vahid qlobal turizm məkanı kimi mövqeyini də gücləndirə bilər.
Əl-Xarci Dohanın 2026-cı il üçün “Körfəz Turizminin Paytaxtı” seçilməsinin regiondakı turizm istiqamətləri arasında inteqrasiyanın dərinləşdirilməsi üçün mühüm fürsət yaratdığını bildirib. O, bu statusun Körfəz ölkələrinin ortaq mədəni və turizm kimliyinin beynəlxalq səviyyədə tanıdılmasına töhfə verəcəyini qeyd edib.
Qətər rəsmisi Körfəz ölkələrinin beynəlxalq turizm qurumlarında təmsilçiliyinin gücləndirilməsinin də vacibliyini vurğulayıb. Bu çərçivədə Qətərin Səudiyyə Ərəbistanının BMT Turizm Təşkilatının İcraiyyə Şurasına üzvlük namizədliyini dəstəklədiyini açıqlayıb.
Əl-Xarci həmçinin Omanın Cəbəl Əxdər bölgəsinin 2027-ci il üçün “Körfəz Turizminin Paytaxtı” seçilməsi namizədliyinə Qətərin dəstəyini ifadə edib. Onun sözlərinə görə, belə təşəbbüslər KƏŞ ölkələri arasında turizm əməkdaşlığının və inteqrasiyanın gücləndirilməsinə xidmət edir.
