Qatar Charity 2026-cı ilin yanvar-iyul aylarında ümumi dəyəri təxminən 809 milyon Qətər riyalı olan humanitar və inkişaf layihələri həyata keçirib. Qətərdəki ianəçilərin dəstəyi ilə reallaşdırılan təşəbbüslər dünyanın 40 ölkəsində 10 milyondan çox insana çatıb.

ArabAZ xəbər verir ki, təşkilatın hesabatına əsasən, humanitar və təcili yardım proqramlarına 236 milyon riyaldan çox vəsait yönəldilib. Bu yardımlar 31 ölkədə təxminən 5,8 milyon insanı əhatə edib.

Humanitar fəaliyyətlərdə Qəzza zolağı, Sudan, Yəmən, Somali və Suriyadakı fövqəladə böhranlara xüsusi diqqət ayrılıb. Eyni zamanda qaçqınlara, məcburi köçkünlərə və Rohinca qaçqınları kimi diqqətdən kənarda qalan humanitar böhranlardan əziyyət çəkən insanlara yardım göstərilib.

Qatar Charity böhranlara daha çevik reaksiya vermək məqsədilə erkən xəbərdarlıq imkanlarının gücləndirilməsi və qərarların daha sürətli qəbul edilməsi üçün məlumat və böhranların idarə olunması üzrə texniki mərkəz də yaradıb.

Davamlı inkişaf sahəsində isə təşkilat 44 ölkədə 11 min 114 layihə həyata keçirib. Təxminən 573 milyon riyal dəyərində olan bu layihələrdən 4,2 milyondan çox insan faydalanıb.

Layihələr əsasən su təminatı, səhiyyə, təhsil, iqtisadi imkanların genişləndirilməsi və ərzaq təhlükəsizliyi sahələrini əhatə edib. Təşkilat qısa müddətdə həyata keçirilə bilən və uzunmüddətli təsir yaradan layihələrə üstünlük verdiyini bildirib.

Sosial qayğı sahəsində “Rofaqaa” təşəbbüsü çərçivəsində himayəyə götürülən şəxslərin sayı 225 mini keçib. Onların arasında yetimlər, ehtiyacı olan ailələr, tələbələr və əlilliyi olan şəxslər yer alıb.

Təşəbbüs çərçivəsində yaşayış, təhsil və mənəvi dəstək proqramları həyata keçirilib. Bunların sırasında Qurani-Kərimin öyrədilməsi üzrə “Furqan” proqramı, həmçinin Şeyx Casim bin Məhəmməd bin Sani Qurani-Kərim Müsabiqəsi çərçivəsində “Rofaqaa” proqramının benefisiarları üçün beynəlxalq bölmənin təşkili yer alıb.