Qətər Ulduzlar Liqası (QSL) cümə axşamı növbəti Baş Assambleya iclasını keçirib. Toplantıda QSL prezidenti Şeyx Həməd bin Xəlifə bin Əhməd Al Sani, qurumun baş icraçı direktoru, İcraiyyə Komitəsinin üzvləri, klubların rəhbərləri və nümayəndələri iştirak ediblər.
ArabAZ xəbər verir ki, QSL prezidenti iştirakçıları salamlayaraq davam edən 2026–2027-ci il futbol mövsümündə bütün klublara uğurlar arzulayıb. O, Qətər futbolunun bütün səviyyələrdə inkişafı üçün liqa rəhbərliyi ilə klublar arasında əməkdaşlığın davam etdirilməsinin vacibliyini vurğulayıb.
Şeyx Həməd bin Xəlifə bin Əhməd Al Sani həmçinin qarşıdakı mühüm turnirlərdə iştirak edəcək Qətər milli komandalarına uğurlar arzulayıb və onların ölkə futbolunun nüfuzuna və hədəflərinə uyğun nəticələr əldə edəcəyinə ümid etdiyini bildirib.
QSL-in baş icraçı direktoru Hani Talib Ballan iclasın gündəliyini təqdim edib. Toplantı zamanı Baş Assambleyanın keçirilməsi QSL-in nizamnaməsinə uyğun olaraq rəsmiləşdirilib, gündəlik təsdiqlənib, iclas protokolunun hazırlanması və yoxlanılması üçün üzvlər müəyyənləşdirilib.
Baş Assambleya 2025-ci il iyunun 2-də keçirilmiş əvvəlki toplantının protokolunu və QSL-in fəaliyyəti ilə bağlı illik hesabatı təsdiqləyib.
İclasda həmçinin liqanın maliyyə ili üzrə yoxlanılmış maliyyə hesabatları və müstəqil auditorun rəyi təqdim edilərək təsdiqlənib. QSL-in nizamnaməsinə dəyişiklik edilməsi ilə bağlı təklif də Baş Assambleyanın razılığını alıb.
Toplantının sonunda iştirakçılar tərəfindən qaldırılan bir sıra sual və qeydlər müzakirə olunub.
