Qətərin Xarici İşlər Nazirliyində dövlət naziri Məhəmməd bin Əbdüləziz bin Saleh əl-Xüleyfi Dohada Avstriya Federal Kanslerinin xüsusi nümayəndəsi Peter Launski-Tiffental ilə görüşüb.

ArabAZ xəbər verir ki, görüş zamanı Qətər və Avstriya arasında strateji münasibətlər, eləcə də müxtəlif sahələrdə əməkdaşlığın genişləndirilməsi və inkişaf etdirilməsi yolları müzakirə olunub.

Tərəflər regionda baş verən əsas hadisələr və gərginliyin azaldılmasına yönəlmiş diplomatik səylər ətrafında fikir mübadiləsi aparıblar. Görüşdə regional təhlükəsizlik və sabitliyin gücləndirilməsinin vacibliyi vurğulanıb.

Müzakirələr zamanı Hörmüz boğazında beynəlxalq gəmiçiliyin təhlükəsizliyinin və sərbəstliyinin təmin olunmasının zəruriliyi xüsusi qeyd edilib.

Əl-Xüleyfi bildirib ki, Qətər dəniz nəqliyyatının sərbəstliyini təmin edəcək həll yolunun tapılmasına yönəlmiş bütün diplomatik təşəbbüsləri dəstəkləyir. O, bu səylərin regionda davamlı sülhə imkan yaradacaq hərtərəfli razılaşmanın əldə edilməsinə gətirib çıxarmasının vacibliyini vurğulayıb.