Körfəz Əməkdaşlıq Şurasına (KƏŞ) üzv ölkələr, İran və İraq müharibənin təsir göstərdiyi Hörmüz boğazında kommersiya daşımalarının artırılması üçün müvəqqəti gəmiçilik dəhlizinin yaradılmasını müzakirə etməyə hazırlaşırlar. Xarici işlər nazirləri səviyyəsində görüş bazar ertəsi Omanda keçiriləcək.

ArabAZ xəbər verir ki, İran rəsmiləri bu həftənin əvvəlində Hörmüz boğazında müvəqqəti gəmiçilik dəhlizinin yaradılması ilə bağlı ilkin razılığın əldə olunduğunu və bunun yaxın günlərdə rəsmən açıqlanacağını bildiriblər.

Məlumata görə, rəsmi açıqlamadan əvvəl region ölkələri Omanda bir araya gələrək boğazdan keçən kommersiya daşımalarının həcminin artırılması imkanlarını nəzərdən keçirəcəklər. Müharibə nəticəsində Hörmüz boğazından keçən ticarət daşımalarının həcminin müharibədən əvvəlki səviyyədən xeyli aşağı düşdüyü bildirilir.

Region ölkələrinin rəsmiləri müharibə başlayandan bəri daha əvvəl də görüşlər keçiriblər. Lakin bu dəfə KƏŞ-in altı üzvü, İran və İraq ilk dəfə Omanda xarici işlər nazirləri səviyyəsində eyni formatda bir araya gələcək.

İran indiyədək Hörmüz boğazındakı mövqeyindən ABŞ-yə qarşı hərbi təzyiq vasitəsi kimi istifadə edib. Tehran hazırda bu imkanını diplomatik vasitəyə çevirməyə çalışır.

Bununla belə, bazar ertəsi keçiriləcək görüşün İranla ABŞ arasında sülh danışıqlarının və ya birbaşa danışıqlar prosesinin bərpası anlamına gəlmədiyi vurğulanır. Əsas məqsəd regional problemə region ölkələrinin iştirakı ilə həll yolu tapmaqdır.