BAKI, AzerVoice
Tayland və Kamboca arasında sərhədyanı ərazilərdə beş gün davam edən silahlı toqquşmalardan sonra atəşkəs rejimi qüvvəyə minib.
AzerVoice xəbər verir ki, bu barədə Malayziyanın Baş naziri Ənvər İbrahim məlumat verib.
Məlumata görə, Kuala Lumpurda Taylandın baş nazir vəzifəsini icra edən Phumtham Veçayaçay ilə Kambocanın baş naziri Hun Manet arasında keçirilən danışıqlardan sonra tərəflər atəşkəs barədə razılığa gəlib.
Qeyd edək ki, tərəflər arasında mübahisənin əsas səbəbi Preah Vihear məbədi və onun ətrafındakı torpaqların kimə məxsus olması məsələsidir. XI əsrdə Anqkor Kambocası dövründə inşa edilən bu məbəd, 1904-cü ildə Fransa ilə Siam (indiki Tayland) arasında imzalanan müqaviləyə əsasən Siam torpaqlarına daxil edilmişdi. Lakin 1907-ci ildə fransız xəritəsində məbəd Kamboca ərazisində göstərilmişdi. 1953-cü ildə Kamboca Fransadan müstəqillik əldə etdikdən sonra Tayland bu məbədi işğal etmişdi. 1959-cu ildə Kamboca BMT-nin Beynəlxalq Ədalət Məhkəməsinə müraciət etmiş və 1962-ci ildə məhkəmə məbədin Kambocaya məxsus olduğuna qərar vermişdi.
2008-ci ildə məbədin UNESCO-nun Dünya İrsi Siyahısına Kamboca abidəsi kimi daxil edilməsi ilə vəziyyət yenidən gərginləşdi. Bu illər ərzində mütəmadi silahlı toqquşmalar yaşandı. Kamboca bir daha Beynəlxalq Ədalət Məhkəməsinə müraciət etdi və 2013-cü ildə məhkəmə Kamboca kompleks və ətraf ərazilər üzərində suverenliyini təsdiqlədi.
Bu il mayın 28-də Tayland Silahlı Qüvvələri Kambocanın Preah Vihear vilayəti ilə Taylandın Ubonratçatxani vilayəti arasında mübahisəli ərazidə yerləşən Kamboca hərbi postuna atəş açıb. İyulun 24-də isə Mambei, həmçinin Tamoantom, Tamoantauç və Takrabei məbədləri ətrafında yenidən döyüşlər baş verdi. Toqquşmalarda hər iki tərəfdən onlarla insan həlak oldu, yüzlərlə insan yaralandı.
