BAKI, AzerVoice, Səməd Əyyubov
ABŞ Prezidenti Donald Tramp, Rusiya Təhlükəsizlik Şurası sədrinin müavini və Rusiyanın sabiq prezidenti Dmitri Medvedevin bəyanatlarına cavab olaraq, Rusiya yaxınlığına iki nüvə sualtı qayığının yerləşdirilməsi barədə göstəriş verib.
AzerVoice xəbər verir ki, bu barədə Tramp “Truth Social” platformasında yazıb.
“Medvedevin son dərəcə təxribatçı bəyanatları ilə əlaqədar olaraq, bu bəyanatların arxasında daha ciddi bir şeyin ola biləcəyini nəzərə alaraq, iki atom sualtı qayığının uyğun bölgələrə göndərilməsi barədə əmr verdim” - deyə, Tramp bildirib. O, bəyanatların konkret məzmununu açıqlamayıb.
Pentaqon hələlik Trampın göstərişinə münasibət bildirməyib və sualtı qayıqların hansı əraziyə göndərildiyi barədə məlumat verilməyib.
Qeyd edək ki, Dmitri Medvedev iyulun 28-də “X” sosial şəbəkəsində paylaşdığı bəyanatında Trampı Rusiya ilə bağlı hədələrinə görə tənqid etmişdi və bildirmişdi ki, "hər bir ultimatum müharibəyə doğru bir addımdır.”
