BAKI, AzerVoice, Səməd Əyyubov
ABŞ Prezidenti Donald Trampın Yaxın Şərq üzrə xüsusi nümayəndəsi Stiven Uitkoff HƏMAS-ın silahı buraxmağa hazır olduğunu iddia edib.
AzerVoice xəbər verir ki, bu barədə İsrailin "Haaretz" qəzeti diplomatik mənbələrə istinadən məlumat yayıb.
Məlumata görə, Uitkoff israilli əsirlərin ailələri ilə görüşü zamanı HƏMAS-ın silahı buraxmağa hazır olduğunu bildirib. Lakin eyni zamanda, Uitkoffun yalnız bütün israilli əsirlərin azad ediləcəyi bir razılaşmanı qəbul edəcəklərini deməsi, əvvəlcədən razılaşdırıldığı iddia edilən detallar ilə ziddiyyət təşkil edib.
“İsrail hökumətinə olan güvəninizi itirmisiniz, bu narahatlığınızı anlayıram, amma Donald Tramp sizin yanınızdadır” - deyə, Uitkoff, əsir ailələrinə müraciətində bildirib.
“Sizə mükəmməl xəbərlər vermək istərdim, amma vəziyyət çox mürəkkəbdir,” – deyə o əlavə edib.
Uitkoff həmçinin, HƏMAS-ı danışıqların uğursuzluğunda sözünə əməl etməməkdə ittiham edib.
Qeyd edək ki, bundan əvvəl HƏMAS yayımladığı bəyanatda Uitkoffun Qəzza zolağına səfərini əvvəldən səhnələşdirilmiş bir tamaşa adlandırmışdı. Bəyanatda həmçinin vurğulanıb ki, Uitkoffun səfərinin məqsədi ictimai rəyə təsir göstərmək, İsrailin imicini təmizləmək və bölgədə tətbiq olunan aclıq siyasətinə siyasi əsas qazandırmaqdır.
