BAKI, Azervoice, Nərmin Ağayeva
İndoneziyanın Yava adasındakı Semeru vulkanında səhər saatlarında iki dəfə püskürmə baş verib.
Azervoice xəbər verir ki, Antara News-un məlumatına görə, Semeru Vulkan Rəsədxanası ilk püskürmənin yerli vaxtla 05:24-də qeydə alındığını bildirib.
Vulkanik kül buludunun hündürlüyü təxminən 600 metrə çatıb və şimal-şərq istiqamətində hərəkət edib.
Eyni gün saat 10:08-də vulkanda ikinci püskürmə baş verib. Bu dəfə də kül sütunu 600 metr hündürlüyə qalxıb.
Qeyd edək ki, “Sakit Okeanın Atəş Halqası” zəlzələ və vulkan qurşağında yerləşən İndoneziyada təxminən 130 aktiv vulkan mövcuddur. Semeru isə ölkənin ən aktiv vulkanlarından biridir.
