BAKI, AzerVoice, Səməd Əyyubov
Niderland hakimiyyəti yaxın vaxtlarda Fələstin dövlətini rəsmi şəkildə tanımağı planlaşdırmır.
AzerVoice xəbər verir ki, bu fikri Niderland Krallığının xarici işlər naziri vəzifəsini icra edən Kaspar Veldkamp parlamentdə Qəzza zolağındakı humanitar vəziyyətlə bağlı keçirilən müzakirələr zamanı səsləndirib.
“Hazırda Niderland Fələstini dövlət kimi tanımağı planlaşdırmır” - deyə, o bildirib.
Debatlar zamanı bir neçə deputat hökumətə Fələstini tanımaq çağırışı edib. “Denk” Partiyasının nümayəndəsi Stefan van Baarle də daxil olmaqla bir sıra deputatlar İsrailə silah ixracının qadağan edilməsini də tələb ediblər.
Niderland parlamentinin aşağı palatasında aparılan bu müzakirələr artıq dörd saatdan çoxdur davam edir. Qeyd edək ki, bunun üçün parlament yay tətilini yarımçıq dayandırıb. Belə ki, yay tətili iyulun 4-dən sentyabrın 1-nə qədər planlaşdırılmışdı. Qəzza ilə bağlı xüsusi iclasın keçirilməsi təklifi Sosialist Partiyası tərəfindən irəli sürülüb və parlament üzvlərinin əksəriyyəti tərəfindən dəstəklənib.
Xatırladaq ki, iyulun 29-da Veldkamp İsrailin səfirini Xarici İşlər Nazirliyinə dəvət edərək, Qəzza zolağındakı ağır humanitar vəziyyətə görə İsrail hökumətini siyasətində dəyişiklik etməyə çağırmışdı.
